تسويق بدون مصروفات اعلانات

ايه علاقة الرغبة في التقليد بالتسويق؟

لو قدرنا نخلى الزباين تقلد بعضها في شراء منتجاتنا يبقى استغلينا الرغبة في التقليد في التسويق

ازاى نشجع ونستغل الرغبة في التقليد للتسويق

مش ممكن تقلد حاجة انت ما شفتهاش أصلا فعلشان نستغل الرغبة في التقليد لازم نخلى الحاجة دى ظاهرة وواضحة
ده هو مفتاح موضوعنا او سؤالنا ازاى نخلى المنتج ظاهر او علنى؟

هنجاوب على السؤال ده وهنشوف ازاى نطبق الكلام ده على حاجتين أولا المنتجات ثانيا الأفكار والتصرفات

المنتجات

تصميم المنتج

من أول الحاجات اللى تقدر تعملها وتخلى منتجك يظهر هي تصميم المنتج

• ابل أيبود لما نزل كان فيه منافسين قبله في السوق لكن ابل قرر يتميز بحاجة ضاهرة الى جانب التميز في الجودة الحاجة دى ببساطة كانت اللون معظم المنافسين استخدموا اللون الأسود فابل قررت تعمل العكس وتستخدم اللون الأبيض وده خلى السماعة تبقى ظاهرة ومميزة والناس تقدر تشوف بوضوح كام واحد بيستخدم ايبود ابل اللى هي شهادة للمنتج وإعلان مجانى

• المصمم الفرنسي كريستيان لوبوتين كان عايز حاجة تميز الأحذية اللى بيعملها عن المنافسين فقرر انه يخلى نعل الحذاء احمر وبقى ده العلامة المميزة له واللى حافظ عليها لغاية النهارده

• كمان الصوت ممكن يكون العلامة المميزة ويندوز زمان كان بيفتح بنغمة معينة ورنة نوكيا كانت مميزة والنهارده فيه رنة مميزة للايفون

تغليف المنتج

من الحاجات الظاهرة جدا التغليف والعلبة اللى بييجى فيها المنتج

• مارلبورو لما غيرت من سيجارة حريمى لسيجارة رجالى كان واحد من العوامل التسويقية المهمة العلبة الكرتون ذات المظهر القوى وكمان اللى كانت بتفتح لفوق وكانت بتضطر الشخص انه يخرج العلبة من جيبه كل ما يحاول يشرب سيجارة وبالتالي كل اللى حواليه يشوفوا ويلاحظوا هو بيشرب ايه

• برنجلز لها عبوة اسطوانية مميزة

• البدل بيكون لها شنطة او كيس عليه البراند

• الاكياس والعبوات تقريبا كل البراندز لها علبة او كيس مميز عليه العلامة التجارية علشان لما الزبون يخرج من المحل كل الناس تشوف هو اترى ايه ، لدرجة ان بعض الناس بتستخدم الاكياس دى كاشارة لمستواها يعنى ممكن يستخدموا الاكياس دى وهم بيتسوقوا ويحطوا فيها منتجات تانية

اللوجو

وطبعا ما نقدرش ننسى اللوجو او شعار المنتج واللى بيعتبر حاجة مميزة وظاهرة بتقول للناس انت بتستخدم ايه
• ومن الحاجات اللطيفة المتعلقة باللوجو لما ستيف جوبز كان محتار يحط اللوجو على الماك بوك ازاى يعنى يخلى اللوجو عدل بالنسبة لصاحب الجهاز ويبقى مقلوب للى حواليه واللا يخليه مقلوب لصاحب الجهاز وعدل للى حواليه وطبعا اختار الاختيار التانى لأن كان يهمه كل اللى حواليك يعرفوا انك بتستخدم ماك
• كمان براندات كتير من اهتمامها باظهار اللوجو بالغت في حجمه جدا على منتجاتها زى نايكى ورالف لورين ولاكوست

الإعلان داخل المنتج

هوتميل لما بدأ كان بيحط داخل الايميل اعلان لنفسه احصل على ايميل شخصى مجانى من هوتميل
وايفون وسامسونج لما بيبعتوا ايميل بنلاقى فيهم مرشل من ايفون او سامسونج وكل شركات السوفتوير اللى بتقدم نسخة مجانية زىميل شيمب بتحط إعلانها او اللوجو بتاعها في المنتج فلو بعت ايميل من النسخة المجانية المتلقى هيعرف انك استخدمت ميل شيمب

الهدايا

من الحاجات المشهورة جدا الهدايا والبراند ريميندر يعنى الأقلام والبلوك نوت والمج اللى عليها اللوجو بتاع المنتج او الشركة واللى الهدف منها تذكرتك وإظهار اللوجو للاخرين
من النصايح المهمة انك تختار هدية سهل رؤيتها من الاخرين

أونلاين

وطبعا مش هننسى الاونلاين الشركات والبراندز بتطلب منك تتابع او تلايك الصفحات بتاعتها لأن ده بيظهر انتماءك للعلامة دى وبيساعد على نشرها لاصدقائك
سبوتيفى بيسيبك تسمع مجانا لكن بينشر على صفحتك على الفيسبوك الحاجات اللى سمعتها لنفس السبب

و مش بس بنطبق الكلام ده على المنتجات انما كمان
الأفكار والتصرفات

ازاى تساعد على انتشار تصرف معين او فكرة من خلال التقليد

طبعا الاختيار او الرأي ممكن يكون حاجة بينك وبين نفسك لكن المسوق الشاطر يقدر يخلى القرار الداخلى ده ظاهر للجميع

• يعنى لو انت بتتبرع لجمعيات السرطان ما حدش هيشوف الكلام ده لكن فيه مجموعة من الشباب قرروا يخلوا التبرع لعلاج والتوعية بسرطان البروستاتا حاجة ظاهرة من خلال تربية الشارب خلال شهر نوفمبر وسموا الحملة موفمبر

أسورة ليفسترونج livestrong مجرد اسورة بلاستيك لونها اصفر لكن ساعدت على اظهار دعم مرض السرطان وجمع الملايين من التبرعات

• حبرالانتخابات هدفه ان المنتخب ما ينتخبش اكتر من مرة لكن كمان له اثر ثانوى انه بيبين كام واحد انتخب والناس بتشير صورها على

السوشيال ميديا وبتشجع غيرها على الانتخاب

• وصناديق التبرعات والتيبس بتكون شفافة وبعض الأماكن بتحط شوية فلوس في الصندوق علشان تبين للناس ان غيرهم اتبرعوا الريدى او ادوا تبس بعكس لو الصندوق فاضى الباقى هيقول مش ضرورى أدى تبس الما ما حدش أدى تبس

هل الظهور جيد دائما

لكن مش دايما الظهور بيكون جيد يعنى من الحملات اللى أدت لأثر عكسى الحملة اللى عملتها نانسى ريجان زوجة رونالد ريجان لتقليل تعاطى المخدرات بين الشباب
الحملة كانت بتبين شباب في مواقف مختلفة بيتعرض عليهم المخدرات وكانوا بيقولوا لأز ى الحملة اللى كان فيها محمد صلاح في مصر
لكن بعد تحليل نتايج الحملة اكتشفوا ان التعاطى زاد
لما حللوا الموضوع اكتشفوا ان الحملة عملت عكس المطلوب
الحملة حسست الشباب اللى ما كانتش المخدرات في بالهم ان المخدرات منتشرة وكتير بيتعاطوها وشجعتهم على التعاطى

لو قدرت تخلى منتجك او رسالتك ظاهرة بابليك ممكن تساعد على تسويقه بدون ما تحتاج تعمل له اعلان
قل لنا في التعليقات فكرة ممكن تطبق بيها الكلام ده