خرافات عن المبيعات يجب أن تتخلص منها اذا كنت تريد النجاح

لازم تكون لحوح

والخرافة دى جت من الاحصائيات اللى بتقول ان العميل بيشترى بعد خمس مرات او اكتر من الاتصال وانك ما تستسلمش بسهولة للرفض المبدئى

الحقيقة ان فيه جزء من الصحة في المقولة دى يعنى فعلا عدد كبير من العملاء بيحتاج للمتابعة اكتر من مرة قبل ما ياخد قرار الشراء لكن لو كل اللى بتعمله انك تكرر نفسك في كل مرة ومش بتضيف معلومة جديدة للعميل هتكون النتيجة ان العميل يزهق منك ويتهرب من مقابلتك او الرد على مكالماتك

يعنى لازم كل اتصال يضيف قيمة للعميل حتى لو مش هيشترى المرة دى

لازم تكون انبساطى

من الخرافات انك لازم تكون انبساطى extrovert  يعنى بتحب الكلام بتحب تتعرف بالناس بسرعة بتبادر بالتعارف

لكن الحقيقة ان الخرافة دى لم تثبت علميا باى شكل

يمكن بنلاقى ناس انبساطيين في المبيعات اكتر لانهم بيبحثوا عن الوظيفة دى وربما لأن عندهم نفس الخرافة

مش معنى كلامى انك لازم تكون انطوائى علشان تنجح في المبيعات

لكن الحقيقة ان الشخصية الناجحة في المبيعات هي الشخصية المتعادلة ambivert     لأن  صفاتها بتؤهلها للنجاح اكتر في المبيعات لأن واحد من عوامل النجاح في المبيعات انك تسمع الزبون والانبساطى بيتكلم اكتر ما بيسمع

لازم تتولد بياع

دى من الخرافات الشائعة انك يا اما مولود بياع يا اما مالكش مستقبل في البيع

الحقيقة ان المبيعات مهارة وسيستم وكأى مهارة لها تدريب ينميها وتقدر بالتدريب المناسب والممارسة الصح والمستمرة تنجح في المبيعات حتى لو كنت مش مولود بياع

مش مهم تعرف معلومات المجال المهم مهاراتك في البيع

صحيح مهارات البيع يمكن تطبيقها في أكتر من مجال لكن مهم جدا انك تكون عارف وفاهم المجال بتاعك أو المنتج اللى بتبيعه

زمان كان البياع عنده ميزة انه عارف كل حاجة عن المجال والمشترى معلوماته أقل لكن النهارده مع انتشار المعلومات بشكل مجانى اونلاين اصبح المشترى بسهولة ممكن يعرف كل تفاصيل المنتج وأسعار المنافسين ومواصفاتهم ويقدر يتفاوض معاك من موقف القوة

أهم حاجة تقفيل الصفقة

صحيح الصفقة مش هتتم من غير مهارات التقفيل closing techniques لكن عملية البيع زى ما قلت سيستم وخطوات مبنية على بعضها ومن غير القيام بالخطوات الأولى وبناء الأساس اللى تقدر تقفل عليه هيكون صعب انك تقفل الصفقة 

خرافة التركيز على الزبون القديم أو البحث عن الزبون الجديد

دى من المشاكل الشائعة في شركات كتيرة

بعض الشركات بتركز على جذب زباين جديدة على حساب اهمال الزبون القديم وبعض الشركات بتنشغل بخدمة الزبون القديم عن البحث عن زبون جديد

الحقيقة ان الاتنين مهمين جدا لنجاح اى شركة

الزبون القديم مصدر دخل مستمر ومش هيكلفك ميزانية تسويق إضافية

لكن الزبون مش بيفضل زبون مدى الحياة الدنيا اتغيرت والزبون بيبحث باستمرار عن عرض افضل أو ممكن يتعرض لظروف تخليه يقفل او ينقل ومن هنا بييجى دور البحث المستمر عن زباين جديدة

الموضوع عامل شوية زى مرجيحة الملاهى لازم تركب ناس مكان الناس اللى بتنزل

المكالمة الباردة  cold call مش فعالة  

المشكلة مش في المكالمة الباردة المشكلة في الأسلوب اللى بيعمله الناس في المكالمة الباردة

المكالمة الباردة المعمولة بشكل احترافى وسكريبت جيد من الوسائل الفعالة cost effective  لأن البديل البيع الشخصى وجها لوجه مكلف جدا فالمكالمة الباردة بتمهد للبيع وجها لوجه وممكن كمان يتم من خلالها إتمام الصفقة وان كان في الغالب هتحتاج لتكملة العملية بالبيع وجها لوجه

المبيعات لعبة ارقام

المقولة دى صح جزئيا بمعنى ان القمع البيعى  sales funnel بيقول ان كل ما عدد المشترين المحتملين اللى دخلوا القمع زاد كل ما العدد النهائي للصفقات التامة زاد

لكن فيه عامل تانى مهم هو عامل الكيف مش بس الكم يعنى مش كل العملاء المحتملين بنفس الأهمية فكل ما تم بحث واختيار العملاء بشكل أفضل كل ما النتيجة النهائية كانت أفضل

كمان انتقال العملاء من مرحلة للتانية في القمع البيعى مش بيتم بشكل اوتوماتيك مش بيتنقلوا لوحدهم يعنى وانما ده بيعتمد على مهارتك كرجل مبيعات انت اللى بتساعدهم يتنقلوا من مرحلة للتانية

الزبون مش محتاج رجل البيع علشان ياخد القرار

صحيح الانترنت والسوشيال ميديا خلت الزبون يعمل جزء كبير من البحث والمقارنة اونلاين لكن اقفال الصفقة خاصة في المنتجات الغالية او المتوسطة بيحتاج غالبا لمهارة رجل المبيعات المحترف

فما تقللش من دورك في إتمام الصفقة لكن خليك عارف ان مسئوليتك زادت والتحدى قدامك اكبر شوية ومحتاج منك انك تكون دارس وحافظ منتجك والمنتجات المنافسة وفاهم المجال او industry اللى بتشتغل فيها

وفى نفس الوقت تكون عارف ومتدرب كويس على مهارات البيع والخطوات الصحيحة اللى لازم تتبعها وانت بتنقل الزبون من مرحلة الى التانية في رحلته من أول ما كان عميل محتمل الى انه يوصل ويبقى مشترى ومش بس كده انما كمان يبعت لك زباين تانية

ماتتكلمش أبدا عن المنافسين

من الخرافات برضه انك لو جبنت سيرة المنافس العميل هيفتكره وممكن يغير رأيه

كأن العميل مش عارف ان فيه منافسين لك في السوق

الصح انك لو احتجت تتكلم عن المنافس او تقارن بين منتجك والمنافس انك تعمل ده لكن بشكل محترف ومن غير ما تحاول تلطخ سمعة المنافس او تدعى عليه ادعاءات غير صحيحة

ده جزء من خرافات كتير منتشرة في مجال المبيعات. اتجنبها علشان تنجح في الكارير ده