Share on facebook
Share on twitter
Share on linkedin
Share on email

سر النجاح في تسويق الخدمات

هذه الحلقة استجابة  لطلبات العديد من الأصدقاء و المتابعين للقناة 

فيه طلب متكرر بالكلام عن تسويق الخدمات وليس فقط المنتجات والسلع

أنا متفق معكم  لأن فعلا فيه اختلافات تميز الخدمات عن المنتجات

هأقول لك بسرعة الفرق بين المنتج والخدمة بس مش عايزك تفتكر ان ده كلام نظرى، أنا هابنى على الفروق دى التكتيكات اللى هافصلها لك في بقية الحلقة

 

و للتوضيح هاخد مثل بسيط هو محل الحلاق لكن المثل ممكن تعميمه على خدمات تانية كتير زى الميكانيكى خدمة التوصيل الصيانات، المطاعم ، مكتب المحاسبة أو الطبيب، المحامى    الخ

فيه أربع اختلافات رئيسية بين الخدمة والمنتج

أولا: الخدمات غير ملموسة يعنى ماتقدرش تمسكها بايدك أو تشوف لونها أو تحس وزنها

ثانيا: لا يمكن فصل تقديم الخدمة عن استهلاكها يعنى الحلاق بيقدم الخدمة دى في نفس الوقت اللى انت بتتلقاها

ثالثا: الخدمة لايمكن تخزينها أو ارجاعها بعد تلقيها يعنى ما ينفعش تخزن حلاقة النهاردة وتستعملها الشهر الجاى ولو القصة اللى الحلاق عملها لك ماعجبتكش ماينفعش ترجعها له

الفرق الأخير بين المنتج والخدمة ان الخدمة بتتفاوت من مرة لمرة يعنى مش كل مرة قصة الشعر هتكون بالظبط زى اللى قبلها

طيب ايه اللى نستنتجه من الاختلافات دى؟

نستنتج ان العميل وهو بيشترى خدمة بيقوم بمخاطرة يعنى لو بيشترى منتج فالمنتج موجود على الرف العميل يقدر يروح المحل ويتفرج عليه ويجربه أحيانا قبل الشراء ويرجعه لو ما عجبهوش

لكن الخدمة غير ملموسة وما تقدرش تشوفها قبل الشراء ومش هتقدر ترجعها

يبقى مفتاح تسويق الخدمة هو تقليل إحساس العميل بالمخاطرة 

لذلك وانت بتسوق لخدمة انت محتاج أكتر انك تطمن العميل على الجودة  قبل الشراء ولازم تقنعه من غير مايلمس الخدمة

طيب تطمن العميل ازاى؟

أظهر مؤهلاتك

اول حاجة تطمن العميل للتعامل معاك انه يعرف انك خبير في المجال بتاعك وده طبعا بنشوفه كتير في عيادات الأطباء أول ماتدخل حجرة الطبيب بتلاقى شهاداته والدورات الطبية اللى حصل عليها مالية الحيطة فلو عندك شهادات أظهرها ما تخبيهاش

أظهر خبرتك

مشكلة الشهادات انك مش هتشوف الشهادة دى الا لما تكون حجزت ودفعت تمن الكشف ودخلت للطبيب

ازاى ممكن تورى الشهادات والخبرة دى قبل ما العميل ييجى لك ؟

من خلال مشاركة المعلومات اللى بتثبت الخبرة دى ببساطة انك تنشر على موقعك أو صفحتك عل الفيسبوك أو قناتك على اليوتيوب معلومات تهم العميل بتاعك بتبين له انك فاهم مشاكله وفاهم حلولها

أظهر نتائجك

لأن العميل مش هيلمس الخدمة الا لما تقدمها له ممكن تخليه تقريبا يلمسها من خلال اظهار النتايج بتاعتك مع عملاء تانيين

خلينا نرجع لمثل الحلاق ممكن تنشر صور القصات المختلفة اللى عملتها على صفحاتك على الفيسبوك وانستجرام

وكتير من الحلاقين بيحط صور في المحل للقصات اللى عملوها

ومحلات التصوير الفوتوغرافى مشهورة بالفكرة دى

ومصممين الجرافيك بيعملوا بورتفوليو بيضم نماذج من شغلهم علشان العميل يشوفها قبل مايقرر يشترى وموقع بيهانس ماهو الا بورتفوليوا لأعمال العديد من المصممين

خلى العملاء يتكلموا عنك

العميل يمكن مايصدقكش لو قلت له انك أحسن واحد في مجالك لكن لو سمع الكلام ده من حد تانى هيصدقه

   يعنى انتشار سمعتك بواسطة العملاء السابقين وكلامهم الايجابى عنك وتوصيتهم بيك

ممكن تستخدم الشهادات دى على موقعك أو السوشيال ميديا انشر قصص النجاح  

  وأنا قبل السوشيال ميديا كنت باشوف أطباء حاطين في عياداتهم لوحات مكتوبة بخط المرضى اللى هم عالجوهم أو عملوا لهم عمليات

ممكن كمان تحفز العميل انه يتكلم عنك ويوصى ببيك من خلال تقديم خدمة خاصة ليه في حالة التوصية زى خصم أو إضافة خدمة مجانية أو حتى معاملة خاصة من حيث سرعة الحجز  مثلا بحيث يشعر انه عميل مميز عندك

 

اهتم بالتغليف

هتقول لى تغليف ايه في الخدمة

التغليف أو    التغليف فى الخدمة هو المؤشرات أو البيئة المحيطة بتقديم الخدمة المؤشرات دى بتبيع الخدمة وترفع قيمتها بالظبط زى تغليف المنتج وشكل العبوة بتاعته اللى ليهم دور كبير في نجاح المنتج

يعنى الديكور ونضافة المكان وريحتة نظافة الأدوات و فخامتها الزى بتاع العمال ومقدمى الخدمة

المطعم اللى ديكوراته حلوة وأدواته فاخرة بيقدر يطلب سعر أعلى لأطباقه والحلاق اللى محله شيك و الفوط بتاعته نظيفة ومكوية والعمال لابسين يونيفورم نظيف ومكوى يبقدر يرفع التسعيرة بتاعته

فيه دراسة لطيفة اتعملت على الأطباء لقت ان المرضى تقييمهم للطبيب كان أعلى  لما كان الطبيب لابس بالطو ابيض مش لبس العمليات الأزرق وكمان التقييم ارتفع اكتر لما الطبيب كان لابس السماعة

اهتم بجودة الخدمة

طبعا بديهى ان مرحلة تقديم الخدمة تكون جيدة لو عايز تستمر في النجاح

جزء كبير من نجاح الخدمات بيتوقف على  العميل المتكرر أو الدائم وعلشان العميل ييجى لك تانى لازم يطلع مبسوط من عندك فلازم تقديم الخدمة يكون ممتاز

فيه مفهوم عايزك تتخيله مفهوم حلقة السمعة

الخدمة الجيدة هتخلى العميل يتكلم عنك كويس ويبعت لك عملاء تانية وهكذا زى حلقة مستمرة

خليك صديق

مش بس تقديم الخدمة من الناحية الفنية اللى لازم يكون ممتاز  انما الجانب الانسانى أكثر أهمية

لازم تخلى التجربة مريحة مطمئنة وسعيدة

يعنى ابتسامتك مع العميل طريقة كلامك معاه كل ده له أهمية وأوقات كتير بتكون أكبر من النواحى الفنية وكلنا مرينا بتجربة التعامل مع مهنى ممتاز فنيا لكن أسلوبه بينفرنا منه

ابنى الفة وصداقة مع العميل وهنا ارجع لدور السوشيال ميديا انها بتخلى العميل حاسس انه يعرفك من قبل ما يتعامل معاك وده بيديك نقط اعلى معاه من غيرك

عايزك تفتكر انك بتقدم خدمة يعنى كلمة السر هي الخدمة انك تستشعر ان هدفك خدمة العميل

الضمان

زى ماقلنا كل اللى بنعمله ده لتقليل الرسك على العميل من الحاجات المهمة برضه في تقليل الرسك الضمان يعنى لو خدمتك تسمح بتقديم ضمان في حالة عدم رضا العميل يقدر يسترد اللى دفعه أو ضمان انك هتصلح المشكلة يكون كويس

خطة تصليح الموقف

زى ماقلنا ان في مجال الخدمات الجودة ممكن تختلف من مرة للتانية فوارد ان مرة يحصل مشكلة فلازم تكون مجهز خطة للتعامل مع المشكلة دى علشان العلاج يكون فورى

 في بعض الفنادق لو العميل اتعرض لمشكلة في الحجز او مالقاش غرفته جاهزة مثلا  بيعملوا ابجريد اوتوماتيك وموظف الحجز بيكون عنده تعليمات يتصرف كده من غير مايرجع لمديره

أرجو أكون وضحت الفرق بين الخدمة والمنتج و أعطيتك بعض الأفكار العملية اللى تقدر تطبقها 

للمزيد أكتب بريدك الالكترونى

سوف أرسل لك معلومات وفيديوهات تساعدك على النجاح فى البزنس 

المزيد من الحلقات

سبعة طرق للترويج لمشروعك بواسطة صفحة فيسبوك

تعرف انك ممكن تروج للبزنس بتاعك سواء كان اونلاين او اوفلاين من داخل صفحة الفيسبوك ومن غير ما تستخدم  Ads manager في بوست النهارده هاقول لك على 7 طرق تقدر تعمل بيها ترويج للبزنس مباشرة من داخل الصفحة وهاقول لك امتى تستخدم كل طريقة وفيهم طريقة ممكن تساعدك في حل مشكلة السعر انبوكس فيه طريقين

المزيد
احترف التسويق الالكترونى بالمحتوى

احترف التسويق الالكترونى بالمحتوى

في مقال النهارده هنعرف ايه هو المحتوى وايه أهميتة   وهنعرف ازاى المحتوى لازم يناسب العميل ويناسب المرحلة اللى العميل بيمر بيها ويساعد فى تحريك العميل من مرحلة للتانية في رحلته ايه المحتوى وايه أهميته   المحتوى مش بس المدونة أو البلوج ،المحتوى هو كل حاجة انت بتحطها على الانترنت سواء بلوج بوست أو سوشيال

المزيد

ابدأ رحلتك مع التسويق الالكترونى بفهم رحلة العميل

ينفع تقابل واحدة ما تعرفش عنها أي حاجة ولا هي تعرف عنك أي حاجة ومباشرة أو خبط لزق تطلب منها الجواز؟ غالبا لأ ولو انت عملت كده فهى غالبا هترفض ويمكن تشك في قواك العقلية ايه علاقة ده بالتسويق الالكترونى  وعنوان مقال النهارده  كمل  قراءة علشان تعرف واحد من المفاهيم المهمة جدا في التسويق الالكترونى

المزيد