طرق زيادة مشاهدات يوتيوب مجانا

Facebooktwitterlinkedinmail

تعبت فى البحث و كتابة السكريبت و التصوير و المونتاج و أخيرا رفعت الفيديو على اليوتيوب
وبعدين بتنتظر , مشاهد اتنين تلاتة
مش ده اللى توقعته بعد كل المجهود  ده
أنت متأكد ان محتوى الحلقة هيفيد ناس كتير  طيب ليه الناس مش بتشوفها
تعمل ايه علشان مشاهدات الحلقة تزيد و توصل للناس اللى عايز توصل لهم ؟
شوف الحلقة عشان تعرف الاجابة

الرؤية الواضحة

لازم يكون لك رؤية محددة وانت بتبدأ القناة ولازم تفكر نفسك بالرؤية دى وانت بتجهز لكل حلقة
حدد بدقة

مين المشاهد

اول حاجة ممكن تساعدك تزود مشاهداتك هى انك تكون محدد مين المشاهد بتاعك بالتحديد
مش كل واحد هيتفرج على قناتك
انما كل مجموعة من الناس عندها اهتمامات مختلفة عن غيرها
كل ما كان محتوى قناتك مناسب لمجموعة المشاهدين اللى انت مستهدفهم كل ما كانت المشاهدة أكبر
فأول خطوة و انت بتبدأ قناتك اقعد مع نفسك و فكر مين المشاهد المثالى اللى انت عايزه يشوف القناة
  النوع : هل عايز الرجال أم النساء يشاهدوا القناة واللا الاتنين .بعض القنوات زى الطبخ مثلا غالب متابعينها  نساء
السن: هل قناتك موجهة للأطفال أم الشباب أم الكبار
أى منطقة جغرافيا : بلد معينة , أم مجموعة بلاد تتحدث لغة معينة , كل البلاد اللى بتتكلم عربى مثلا
المعايير دى تسمى ديموجرافية و جغرافية
لكن أهم منها المعايير النفسية و حسب الاهتمام
يعنى فيه متابع عايز حاجة مسلية
فيه واحد عايز معلومة فى مجال متخصص
قناتى مثلا بتستهدف الناس فى مجالات المبيعات و التسويق و أصحاب الأعمال الصغيرة و المتوسطة
اللى محتاجين معلومات عن مهارات البيع و التسويق و ادارة الأعمال بطريقة بسيطة بعيدا عن تعقيد الكتب و الدراسة الأكاديمية

 المشاهد محتاج ايه

بالنسبة لقناتى المشاهد عايز معلومات عن المبيعات والتسويق و ادارة الاعمال , وعايز المعلومة باللغة العربية و باسلوب سهل مش أكاديمى و عايز معلومة عملية يعنى بعد الحلقة يبقى عارف ممكن يعمل ايه و يطبق الكلام ده ازاى مش هدفى بس انك تتحمس و تطلع بشعلة نفسية تنطفى بعد ساعات انما هدفى تحصل على خطة تنفيذ و خطوات عملية محددة تقدر تنفذها فورا ويكون ليها مردود على شغلك

الافاتار   او المشاهد النموذجى

من الادوات اللى بتساعد على تحديد المشاهد النموذجى هو رسم أفاتار أو صورة نموذجية للمشاهد ده
بعد الوصول لتصور واضح للمشاهد هات صورة من الانترنت لشخص شبيه بالصورة اللى تخيلتها سواء رجل أو امرأة فى سن معين
اكتب تحت الصورة اسم الشخص , ايوه اخترع اسم , كمان اكتب مواصفات الشخص ده يعنى مثلا سامى صاحب محل ملابس فى مول بيبيع ملابس نساء و أطفال زباينه من الطبقة المتوسطة معتمد فى التسويق على انتشار اسمه من خلال الزباين فقط

القناة

بعد تحديد المشاهد الخطوة التانية هى ان المشاهد ده لما يشوف قناتك يعرف انها موجهة ليه
هيعرف ده منين

تصميم القناة شكله ايه و مكتوب عليه ايه
قسم “عن” بيقول انت مين وهدفك من القناة ايه و هتنزل فيديوهات امتى
بلاى ليست بتعرف المشاهد برضه نوعية المحتوى
عناوين الفيديوهات و الثامبنيل “الصورة” و الوصف بتاع الفيديو
مهم كمان من وقت للتانى تنظف بعض  الحاجات يعنى فيه قنوات فيها لنكات مش شغالة , أو وصف قديم اتغير

المحتوى

أهم حاجة بتحدد نجاح قناتك انك تقدم محتوى مفيد للمشاهد و مناسب ليه يعنى لازم المشاهد يلاقى قيمة فى القناة واللا هيسبك لغيرك
من الأجزاء المهمة فى المحتوى

 عنوان الحلقة

 لأن ده أول حاجة بتقول للمشاهد اذا كانت الحلقة دى تهمه و يضغط علشان يشوفها واللا لأ

Thumbnailالثامبنيل

الصورة و المكتوب عليها ممكن تجذب انتباه المشاهد لنه بياخد قراره فى جزء من الثانية بناءا على الثامب نيل

محتوى الحلقة فعليا

هل المحتوى مطابق للعنوان و الثامب نيل
لو المحتوى طلع مختلف المشاهد مش هيكمل الحلقة وده هيأذى المشاهدات و المتابعة
و خوارزمية  اليوتيوب كانت زمان معتمدة على المشاهدات فاليوتيوبرز كانوا بيعملوا طعم لاجتذاب المشاهدين
لكن النهاردة المعادلة اتغيرت و بقى العامل الاساسى وقت المشاهدة لأن ده الدليل على اعجاب المشاهد بالفيديو

طول الحلقة

مافيش طول محدد لكن القاعدة هى خلى طول الحلقة بالقدر الكافى لتوصيل المعلومة بوضوح ولكن بأقصر ما يمكن
يعنى لو هتوصل المعلومة فى 5 دقايق ماتخليش الحلقة ستة أو سبعة 
من التعليقات اللى  بتيجى لى كتير ان الحلقة مركزة ومافيهاش تطويل و ملل
لأنى عارف ان وقتكم غالى و ان اللى داخل على قناتى عايز معلومة بسرعة من غير لت و عجن
فيه اداة فى اليوتيوب ستوديو ممكن تساعدك تعرف اذا كان العنوان و الثامب نيل جذابين واللا لأ هى الكليك ثرو ريت
النسبة دى بتحسب من كل 100 واحد بيشوفوا صورة الحلقة و اسمها كام واحد بيضغط علشان يشوفها

التواصل

اليوتيوب مش تليفزيون
اليوتيوب من وسائل التواصل الاجتماعى فجزء من اسباب النجاح هو التواصل مع المتابعين
طلب منهم المشاركة برأيهم
والاضافة للمعلومة اللى قلتها من واقع خبرتهم
و الأهم انك ترد على استفساراتهم
أنا باحاول أرد على القناة و أحيانا بعض المتابعين بيطلب التواصل بطريقة غير معلنة فبنتواصل على المسنجر أو التليفون
كمان التواصل ده بيديك أفكار للفيديوهات الجديدة
خلى  تركيزك على المساعدة و الخدمة و هتلاقى المردود

الاستمرار

من أهم العوامل الاستمرار من حيث مواعيد النشر
الاستمرار من حيث نوعية المحتوى
المتابع عايز يعرف يتوقع منك ايه
حتى ان احيانا يكون الاستمرار اهم من الاتقان
يعنى لو المحتوى جيد بدرجة كافية وبيقدم قيمة مع الاستمرار والانتظام  اهم من محاولة عمل حلقة ماحصلتش و احتمال التاخر او عدم الانتظام
يفضل عمل حلقة على الاقل مرة كل اسبوع ولو تقدر اكتر يكون افضل

قول لى لو عندك قناة أو بتفكر تبدأ قناة , و ايه اللى مانعك من البداية

Facebooktwitterlinkedinmail

Similar Posts

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *