علم زبونك يشترى

البياع التقليدي

من فترة قريبة اشتريت ترابيزة سفرة جديدة

أثناء رحلة البحث رحت لأكتر من محل موبيليا

كل البياعين بلا استثناء كانوا بيركزوا  على بيع المنتج وخلاص يعنى ممكن يتكلموا  عن السعر أوالعرض والخصم الموجود

وحتى ابسط المعلومات زى مقاس الترابيزة دى قد ايه  وممكن كام كرسى يدخلوا الترابيزة كنت لازم اسأل عنها بنفسى

ده البياع التقليدي اللى كل تركيزه على بيع المنتج مش مهتم بالزبون نفسه

البياع المعلم

لكن البياع اللى ممكن نطلق عليه لقب البياع المعلم كان ممكن يكلمنى عن الخامات اللى بيستخدموها أو طريقة تثبيت الأجزاء ببعض وازاى بتساعد الأثاث يعيش أكتر أو التصميمات اللى بيعملوها وازاى بتواكب الموضة الحالية 

وبعدين ممكن يكلمنى عن الترابيزة نفسها مقاساتها لونها يمشى مع ايه، ايه الستايل بتاعها، يناسبنى واللا لأ، الفرق بين ترابيزة جيدة وترابيزة مش جيدة، ايه يخلى ترابيزة أغلى من التانية

كل دى معلومات بتعرفنى مفروض أشترى على أي أساس أو آخد القرار بناءا على ايه، buying criteria   يعنى

ده ما يمنعش ان البياع برضه يكلمنى عن السعر والعرض المغرى لكن تأثيره هيكون أكبر لو علمنى كزبون المواصفات اللى مفروض اشترى بناءا عليها بغض النظر عن السعر 

تفتكر لو البياع كلمنى بالطريقة دى فرصة الشراء من محل زى ده هتكون اكبر؟

تفتكر كمان هيكون عندى ولاء للمحل ده وارجع له تانى لو احتجت اشترى اثاث تانى؟ طبعا

لو البياع حاول تعليمى كزبون  هيقدر  يخلينى اشترى وكمان ارجع تانى لنفس المحل

هل الزبون محتاج تعليم؟

جايز حد يسأل هو الزبون محتاج تعليم؟ هو مش عارف يعنى هو عايز ايه؟

الإجابة ان معظم الأوقات الزبون مش بيكون خبير في الحاجة اللى بيشتريها زى موقف الترابيزة ده

ثم  انت تعرف ايه عن تنظيف السجاد او صيانة العربية او الحسابات؟

لو ده مش تخصصك فمعلوماتك اما معدومة او على افضل تقدير معلومات سطحية

بالتالى وانت بتختار شركة تنظيف السجاد او الميكانيكى او المحاسب بتكون قلقان وبتاخد risk  ومش عارف تختار مين وعلى أي اساس

هنا دور التعليم بييجى لما بتعرف الزبون مفروض يختار على اى أساس بتسهل عليه القرار وبتدى نفسك فرصة تبيع لأن انت اللى علمته أصلا انت اللى حددت له مواصفات الشراء

مثل تنظيف السجاد لما الزبون يتصل بيك تقدر تعرفه ازاى ان المواد المستعملة في التنظيف ممكن تأثر على صحة اللى في البيت او على العمر الافتراضى للسجادة

تعليم الزبون هيكبر لك السوق

فيه ميزة تانية كبيرة لتعليم الزبون او التسويق بالتعليم

الميزة دى ان التسويق بالتعليم ممكن يكبر لك السوق

ازاى؟

طول الوقت بيكون فيه نسبة صغيرة من الزباين هي اللى مستعدة للشراء دلوقتى

النسبة دى قد لا تتعدى 3% دول الزباين اللى بيدوروا فعلا على المنتج ومقررين لما يلاقوا العرض المناسب يشتروا على طول

لكن ال97% الباقيين بيتفاوتوا بين ناس ممكن تشترى الناس دى جايز مش مبسوطة من المنتج الحالي لكن لسه ما خدتش قرار التغيير، وناس مش مهتمة وناس رافضة الفكرة

فلو اتكلمت في اعلاناتك او المحتوى بتاعك عن المنتج مباشرة اللى هيهتم بكلامك بس التلاتة في المية اللى بيدوروا على المنتج حاليا لكن سبعة وتسعين في المية مش هيهتموا

لكن لو اتكلمت عن المشكلة وغالبا  المشكلة دى تهم السبعة وتسعين في المية كل الزباين المحتملة هتهتم بكلامك او اعلانك او المحتوى بتاعك

مثلا لو بتبيع أثاث مكتبى وكانت صيغة اعلانك عرض الشهر على الأثاث المكتبى او افضل سعر في مصر زى ما بنشوف كتير انت استهدفت بس اللى بيدور على اثاث النهارده

لكن ماذا لو كان الإعلان عن تاثير الأثاث على إنتاجية الموظفين او ازاى الأثاث الصح بيرفع إنتاجية الشركة 10% تفتكر فرصتك تجذب انتباه نسبة اكبر من الزباين ياترى كام صاحب شركة او مدير شركة يهمه يرفع إنتاجية شركته 10%

التسويق بالتعليم بيساعدك تجذب انتباه  الزبون

التحدى الأكبر في عملية التسويق والبيع هو جذب انتباه الزبون بما يكفى انه يسمع رسالتك الاعلانية ويهتم بيها

للأسف الكلام عن نفسك ومنتجك بيفشل في تحقيق هذا الهدف لكن الكلام عن الزبون ومشاكله وطموحاته بيساعدك توصل للهدف ده بسرعة وسهولة

هل الكلام ده ينفع مع اى منتج

علشان أبين لك ان التسويق بالتعليم ممكن ينفع مع اى منتج هاضرب لك مثل لو عندك محل أحذية أو بتصنع أحذية

لو عرفت ان قدمك بتحتوى اكتر من 7000 نهاية عصبية وبتعرق ما يقارب 170 سم مكعب في اليوم

هل المعلومة دى ممكن تساعدك تبيع الشوز بتاعك لو مريح للرجل تاثيره على راحة جسمك واستمتاعك بحياتك

لو مصمم لتهوية الرجل او التخلص من العرق

الخلاصة

التسويق بالتعليم هيديك ميزة تنافسية

الميزة دى  ممتدة long term مش مؤقتة

هيخلى الزبون يحترمك وتبقى في نظره  خبير ومحل ثقة

هيحميك  من المنافسة على السعر

هتحتفظ بولاء العملاء