Share on facebook
Share on twitter
Share on linkedin
Share on email

كيف أبدأ التسويق الالكترونى

زى ما اتعودتوا أنا باحب أبسط المعلومة وأعرضها بشكل عملى وعشان كده احب أبدأ بالتأكيد على مفهوم مهم جدا

ان التسويق الالكترونى هو تسويق قبل ما يكون الكترونى يعنى ايه

يعنى لو ركزت على التسويق , لو فهمت مبادئ التسويق والتزمت بيها ده هو الأساس اللى هيساعدك تنجح في التسويق الالكترونى

لكن لو شغلت نفسك بالنص التانى يعنى الالكترونى هنا بتحصل المشاكل والناس بتتلخبط وبتحس ان التسويق الالكترونى عالم من الطلاسم  لأن الجزء ده بيركز على الأدوات، والأدوات في المجال ده بتتغير كل يوم

وعلشان نفهم حاجة ضرورى فى الأول نبص لها من بعيد شوية علشان نشوف الصورة الكاملة قبل ما نقرب ونشوف التفاصيل

بالظبط زى قطع البازل لو شفت كل قطعة لوحدها مش هتفهم الصورة ومش هتعرف علاقتها ببعضها ايه لكن لو بعدت وشفت كل القطع جنب بعضها هتفهم الصورة

وده اللى هنعمله في حلقة النهارده ان شاء الله هنبص من بعيد لبازل  التسويق الالكترونى ونعرف ايه مفهومه وايه أجزاؤه وعلاقة الأجزاء دى ببعضها وبعدين في مقالات جايه ان شاء الله هنتكلم عن كل قطعة لوحدها

يعنى لو انت منتظر تفاصيل ازاى تعمل اعلان فيسبوك أو فيديو على اليوتيوب ماتزعلش لأنك مش هتلاقى ده في المقال ده لأن هدفى انك تشوف الصورة الكبيرة وصدقنى لما تفهم علاقة الحاجات دى ببعض هتسبق ناس كتير 

وعلشان نختار قطعة من البازل نبدأ كلامنا بيها هاسألك سؤال

العميل او الزبون بيعمل ايه على الانترنت؟ قدامك 5 ثوانى تفكر في الاجابة

الإجابة: الزبون بيعمل حاجتين أساسيتين

الحاجة الأولى انه قاعد على السوشيال ميديا بيتسلى أو بيتواصل مع أصحابه أو بيعرف أخبار الدنيا

الحاجة التانية انه بيدور أو بيبحث عن حاجة : معلومة أو محل أو منتج

 

السوشيال ميديا

 يبقى علشان الزبون يلاقيك  لازم تتواجد على منصات التواصل الاجتماعى فيسبوك انستجرام تويتر لنكدان و يويتيوب بالمناسبة فيه ناس شايفه ان يوتيوب مع منصات السوشيال ميديا وناس بتقول انها محرك بحث زى جوجل

واحنا مش هنروح السوشيال ميديا علشان نتسلى او نتواصل مع العملاء وبس انما هدفنا في النهاية نبيع لهم

يبقى الجزء الأول من البازل هو منصات التواصل الاجتماعى وده فيه تفاصيل زى المحتوى والارتباط والاعلانات هنتكلم عنهم بتفصيل بعدين ان شاء الله

البحث

 وثانيا لازم تتواجد في البحث يعنى لو الزبون دور في جوجل يلاقى موقعك.  يبقى الجزء التانى من البازل البحث وده بيدخلنا في باب كبير اسمه بالعربى تقوية مركزك في محركات البحث

SEO: search engine optimization

 برضه هنتكلم عنه ان شاء الله في مقالات جاية

 

 

المحتوى

الجزئين دول بينقلونا لجزء تالت  من البازل مش هنقدر نتواجد على المنصات الاجتماعية وفى البحث من غير ما نحط حاجة على المنصات دى علشان العميل بتاعنا يشوفها الحاجة دى بنسميها المحتوى 

content

والمحتوى هو اللى هيشد العميل لنا وكمان هيحركه من خطوة للتانية في رحلته اللى هنسميها رحلة العميل

 ممكن المحتوى ده يكون مكتوب على شكل محتوى الموقع بتاعك أو مدونة   أو بوست في الفيسبوك أو يكون صور في انستجرام او فيديو على يوتيوب او حوار  على منصات البودكاست

 

بالشكل ده لما العميل يدخل السوشيال ميديا أو يبحث في جوجل يلاقينا

هنعرف في مقالات جايه ان شاء الله ازاى نعمل استراتيجية  المحتوى وازاى نعمل المحتوى

 

طيب هل هنكتفى بده؟ للأسف مش كفاية لأن الحاجات اللى قلناها يعنى السوشيال ميديا والبحث والمحتوى بتساعد العميل اللى بيدور يلاقينا

 لكن احنا محتاجين كمان اننا نروح للعميل وده بيتم من خلال حاجتين الإعلانات والايميل

الإعلانات

والإعلانات موجودة في كل المنصات. والوحشين الكبار في الإعلانات هما طبعا الفيسبوك وانستجرام من ناحية وجوجل ويوتيوب من ناحية. يبقى الجزء الرابع من البازل هو الإعلانات ,وبرضه هنتكلم بالتفصيل عنها في حلقات جاية ان شاء الله  

الايميل

والجزء الخامس من البازل هو الايميل يعنى انت اللى بتبعت للعميل الرسايل التسويقية والمحتوى  على الايميل بتاعه

طبعا الايميل فعال جدا بره وبرضه في بلادنا بس بيختلف فعاليته على حسب السوق والمنتج و العميل

 وفيه أنواع مختلفة من الايميلات وتفاصيل عن ازاى نضمن وصول الايميل للعميل وانه يفتحه ويتفاعل معاه وان الايميلات تبقى اوتوماتيك  هنعرفها في المقالات الجاية ان شاء الله

 

رحلة العميل

اللى بيحدد نستخدم ايه وما نستخدمش ايه من القطع دى ونقول ايه في المحتوى بتاعنا وامتى واللى بيربط الأجزاء دى ببعضها حاجة اسمها رحلة العميل. يعنى رحلة العميل من أول ما كان مايعرفش حاجة عن منتجك لغاية مابقى عميل مخلص ليك وكونت معاه صداقة مستمرة

 هنعتبر رحلة العميل دى الاطار اللى البازل بتاعتنا راكبة فيه وهنتكلم عليها بالتفصيل لأنها مفهوم مهم جدا وناس كتير بتضيع مجهود ووقت وفلوس على التسويق الالكترونى بدون نتيجة  لأنها مش فاهمة الفكرة دى ومش عارفة العميل بتاعها في أي مرحلة من الرحلة وهنعمل مقال مخصوص ان شاء الله لرحلة العميل

التحليلات

طبعا اللى بيميز التسويق الاكترونى الى جانب انه وسيلة تسويق مباشرة بتوصل للزبون اللى انت عايزه انك تقدر تقيس وتعرف نتيجة كل حاجة بتعملها من خلال التحليلات سواء على جوجل او فيسبوك ودى برضه هنعرفها في وقتها ان شاء الله

 

:ولأول وهلة قد تبدو الصورة معقدة أو فيها أجزاء كتيرة لكن سر النجاح في التسويق الالكترونى

 أولا انك تشوف الصورة الكاملة للبازل ومكان كل جزء من البازل وده اللى عملناه النهارده

والجزء التانى انك تركز على قطعة من البازل لغاية ماتعملها صح وبعدين انقل على قطعة تانية، خد وقتك، ادرس واعرف وطبق كل جزء من البازل على حده ولما تتأكد أنك أتقنت الجزء ده وطبقته في شغلك صح انقل على الجزء اللى بعده

لكن لو فضلت تنط من مكان لمكان وتحاول تشغل نفسك بالتكتيكات وتنسى الصورة الكبيرة هتضيع وقت كتير جدا ومش هتعمل خطوات لقدام

خلاصة حلقة النهارده اللى عايزك تطلع بيها هى

مفهوم البازل

 وانك لازم تركز على قطعة واحدة كل مرة

احنا بدأنا بس من بعيد قوى بأجزاء التسويق الالكترونى في المقالة الجاية ان شاء الله هنعرف أكتر رحلة العميل وازاى أجزاء البازل دى بتتحط جنب بعضها

للمزيد أكتب بريدك الالكترونى

سوف أرسل لك معلومات وفيديوهات تساعدك على النجاح فى البزنس 

المزيد من الحلقات

سبعة طرق للترويج لمشروعك بواسطة صفحة فيسبوك

تعرف انك ممكن تروج للبزنس بتاعك سواء كان اونلاين او اوفلاين من داخل صفحة الفيسبوك ومن غير ما تستخدم  Ads manager في بوست النهارده هاقول لك على 7 طرق تقدر تعمل بيها ترويج للبزنس مباشرة من داخل الصفحة وهاقول لك امتى تستخدم كل طريقة وفيهم طريقة ممكن تساعدك في حل مشكلة السعر انبوكس فيه طريقين

المزيد
احترف التسويق الالكترونى بالمحتوى

احترف التسويق الالكترونى بالمحتوى

في مقال النهارده هنعرف ايه هو المحتوى وايه أهميتة   وهنعرف ازاى المحتوى لازم يناسب العميل ويناسب المرحلة اللى العميل بيمر بيها ويساعد فى تحريك العميل من مرحلة للتانية في رحلته ايه المحتوى وايه أهميته   المحتوى مش بس المدونة أو البلوج ،المحتوى هو كل حاجة انت بتحطها على الانترنت سواء بلوج بوست أو سوشيال

المزيد

ابدأ رحلتك مع التسويق الالكترونى بفهم رحلة العميل

ينفع تقابل واحدة ما تعرفش عنها أي حاجة ولا هي تعرف عنك أي حاجة ومباشرة أو خبط لزق تطلب منها الجواز؟ غالبا لأ ولو انت عملت كده فهى غالبا هترفض ويمكن تشك في قواك العقلية ايه علاقة ده بالتسويق الالكترونى  وعنوان مقال النهارده  كمل  قراءة علشان تعرف واحد من المفاهيم المهمة جدا في التسويق الالكترونى

المزيد