Share on facebook
Share on twitter
Share on linkedin
Share on email

كيف تبيع لكل زبون يدخل محلك فى 6 خطوات

Facebooktwitterlinkedinmail

حلقة النهاردة هتساعدك تزود مبيعات المحل من خلال 6 خطوات بسيطة تعملها مع كل زبون. لو انت مسئول عن المبيعات فى المحل او مدير او صاحب المحل , الحلقة دى علشانك

فى البداية قل لى لو ده اللى بيحصل فى المحل عندك؟

  • الزبون بيدخل المحل و يقرب من قسم القمصان
  • البائع من ورا الكاونتر ممكن يتجاهل الزبون تماما كأنه ماشافهوش ,  او يقول اهلا بتدور على حاجة معينة؟
  • الزبون لا بتفرج بس. فالبائع يسيبه يتفرج
  • بعد شوية الزبون يسأل عندكم قمصان كاجوال؟
  • البائع ايوه عندك على الرف اللى فوق
  • الزبون يروح ياخد القميص  ويحاسب

خلينا نتفق ان ده مش بيع

البيع انك تضيف قيمة للزبون وللمحل, انك تخلى الزبون يحصل على احسن وانسب حاجة له و فى نفس الوقت  تحقق للمحل اكبر مبيعات من الزبون ده. هى دى وظيفتك كمسئول مبيعات فى المحل أو حتى كصاحب محل.  وعلشان السيناريو اللى شفناه ده ما يحصلش فى محلك او المحل اللى بتشتغل فيه هاقولك على 6 خطوات تعملها مع كل زبون

الخطوات دى تنفع فىى اى مجال لكن استجابة لكتير من طلبات الاصدقاء هاضرب امثلة عن محلات الملابس

الخطوات الستة لعملية بيع  ناجحة

1-التحية

الخطوة الأولى الطبيعية انك تحيى الزبون لكن المهم ان التحية لازم تكون خلال 15-20 ثانية من وقوف الزبون امام قسم معين. لو الزبون لقى ان مافيش حد مهتم او ماعرفش الحاجة اللى عايزها موجودة فين هيمشى ويروح المحل اللى جنبك

كمان التحية مش مجرد تحية روتينية لأ, حييه كأنك بتستقبله فى بيتك ,ابتسم وحسسه انه مرحب بيه. ياما بنشوف ناس فى السيلز بتعامل الزبون بجفاء وكأنه هو اللى محتاج لهم أو بيكون على وشهم تكشيرة كانهم متخانقين فى البيت قبل ما يروحوا الشغل

احفظ صيغة بسيطة للترحيب زى “مساء الخير , اهلا بك في محل كذا” , و لو تعرف اسم العميل “اهلا أستاذ فلان” ولو تعرف حاجة عنه قول حاجةسريعة تدل على المعرفة دى زى “ابنك عمل ايه فى المباراة أو دخل كلية ايه؟”
ده بيخلى العميل يحس انك مهتم بيه و بخدمته مش بس عايز تبيع له

ماتتسرعش فى الحكم على الزبون. بعض السيلز بيروح للعميل وهو شايف ان شكله كده امكانياته ماتسمحش يشترى حاجة معينة فيعرض عليه حاجات رخيصة او الأسوأ انه يقع بلسانه ويقول حاجة زى “دى غالية شوية خلينى اوريك حاجة ارخص”. فيه ناس كتير بتخرج تتسوق فى لبس بسيط و مريح برغم من مستواهم المادى المرتفع

أقول لك على حيلة لطيفة بقى.ماتروحش بايدك فاضية خد معاك شوية ملابس عشان الزبون مايحسش انك جاى له مخصوص . فيه زباين كتير بيحسوا بعدم الراحة لو حسوا انك مراقبهم أو ممكن تفرض عليهم حاجة او تبيع لهم حاجة مش مقتنعين بيها . كمان فكرة انك كنت رايح تعمل حاجة و توقفت عشان تكلم الزبون بتدى فكرة طيبة عنك و ساعتها الزبون اول ما بيحتاج لحاجة بيتوجه لك بالسؤال و لو مش محتاج حاجة بيكون سهل
تكمل مشى من غير ما تضطر تقف جنبه

خد الزبون فى جولة سياحية و هو فى مكانه. بعض الزباين بيخجلوا يسألوا الحاجة فين, قول لهم بسرعة “هنا القمصان هناك البنطلونات وعلى اليمين التى شيرت” ,يعنى اديهم خريطة سريعة. ده بيخليهم يبدأوا يتحركوا فى الاقسام المختلفة وممكن يفتكروا حاجة كانوا ناسيينها
و قبل ما تسيبه يكمل فرجة قول له “انا موجود هناك لو احتجت لحاجة”
لما تلاحظ انه مهتم بمنتج معين ارجع وقول حاجة ايجابية عن المنتج ده زى خامته او تكنيك معين فى التصنيع او انه اكتر موديل مطلوب

2-الالفة

قبل ماتبدأ البيع حاول لو أمكن تعمل نوع من الالفة مع الزبون
اظهر اهتمامك بحاجة شدت انتباهك: زبون كبير في السن ماشى بنشاط وشكله رياضى: ؟ماشاء الله حضرتك بتمارس رياضة ايه” ممكن يرد : “بالعب تنس او باجرى او باروح الجيم”. ممكن ترد “انا كمان باروح الجيم بعد الشغل بحس بانه بيحافظ على صحتى ونشاطى”
اكتشاف حاجة مشتركة مع الزبون بتخلق نوع من الالفة و ممكن تسهل البيع وتسيب ذكرى مميزة عنك ماتبقاش مجرد بائع زى غيرك
ملحوظة لو حسيت العميل مش عايز يتجاوب ماتضغطش عليه

3-اسأل

المعتاد ان السيلز بيسأل “بتدور على حاجة معينة” والاجابة بليزر او بنطلون او جينز لكن ده مش بيساعدك تضيف حاجة لكن لو سألت بطريقة تعرفك الهدف من الشراء مش بس الصنف المطلوب زى “بتدور على حاجة لمناسبة معينة أو للمكتب أو الخروج” الاجابة هتساعدك مش بس تقدم للزبون المنتج المناسب انما كمان ممكن تعرض عليه اكتر من منتج يناسب ا الهدف اللى هو عايزه :”انت عايز قميص كلاسيك لبدلة كحلى يبقى الألوان دى مناسبة و القماشة دى ياترى عايز حزام و جزمة؟ ياترى محتاج كرافاتة؟”
الاسلوب ده كمان بيساعدك مع الزباين اللى مش بيقدروا يقرروا او يخلصوا فى زيارة واحدة , لما هتعرف احتياجاتهم هتقدر توجههم و تخلص البيع

4-الصفات و المميزات

قول بعض صفات ومميزات المنتج عشان تحدد الاختيارات اكتر
“الجاكت ده من جلد الماعز صفة و ده بيخليه انعم و اكثر تحملا ميزة”
ذكر الصفات بس مش كفاية لازم الزبون يفهم الصفة دى معناها ايه وهتفرق معاه ايه

5-اقفل الصفقة باضافة منتج يرفع القيمة الاجمالية للصفقة

لما الزبون يقول هاشترى ده او ادفع فين حاول ترفع قيمة الصفقة باضافة حاجة واحدة مكملة للى اشتراه
مهم جدا ماتعرضش الاضافة دى لغاية ما الزبون يقرر فى الحاجة الاولى
بيع حاجة بسيطة يعنى الحذاء ممكن تعرض معاه ورنيش او فرشه او شراب مش حذاء تانى
ارسم صورة توضح له ازاى الاضافة دى بتكمل اللى اشتراه، “الورنيش ده هيحافظ على لمعان الجلد ويحميه من التشقق فتفضل الجزمة زى ما اشتريتها بعد سنة من النهاردة”
اقترح حاجة واحدة بس مش لستة للاختيار عشان ماتلخبطش الزبون و تفقد الصفقة

6-ابنى جسر للتواصل

وانت بتسلم على العميل اطلب منه تليفونه والايميل واديه كارت فيه عنوان الفيسبوك بتاع المحل عشان تقدر تتواصل معاه تانى و ماتكونش بيعة و خلاص

Facebooktwitterlinkedinmail

للمزيد أكتب بريدك الالكترونى

سوف أرسل لك معلومات وفيديوهات تساعدك على النجاح فى البزنس 

المزيد من الحلقات

كيف تختار سعر المنتج لزيادة الربح

كيف تختار سعر المنتج لزيادة الربح

أصدقاء كتير للقناة بيسألوا ازاى احدد سعر المنتج بتاعى؟طبعا الاصدقاء دول عندهم حق يسألوا عن موضوع تحديد السعر دهلان سعر منتجاتك من اهم العوامل اللى بتحدد مكسبك و اللى بناءا عليه قد ايه هتقدر تصرف على التسويقو قد ايه ممكن شغلك يكبر، و الغلط فى تحديد السعر واحد من الاسباب الرئيسية ورا فشل تجارات كتيرة

المزيد
لهذا يفشل اعلانك على الفيس بوك

لهذا يفشل اعلانك على الفيس بوك

من الشكاوى الشائعة جدا “عملت اعلان فيسبوك وماجابش نتيجة او فيه تفاعل كبير على الإعلان لكن مافيش بيع”“هي إعلانات فيسبوك مابقاش لها لازمة؟”طبعا فيه اكتر من سبب للشكوى دى لكن واحد من الأسباب المهمة هو أول خطوة في الإعلان، اختيار هدف خاطئ للحملة الاعلانيةعلشان كده في حلقة النهارده هاتكلم عن ازاى تختار الهدف الصح للحملة

المزيد
كتابة الخطة التسويقية بطريقة sostac

كتابة الخطة التسويقية بأسلوب sostac

• من الأسئلة الكتيرة اللى بتيجى لى أسئلة زى أنا عملت موقع تجارة الكترونية ومش شغال أو عندى صفحة على فيسبوك او انستجرام ممكن تشوفها وتقولى ممكن أحسنها ازاىأو أنا عملت منتج handmade أو استوردت منتج بس مش عارف أسوق له ازاى• ولما بسال الناس دى انت ليه اخترت المنتج ده او مين الزبون او

المزيد