أصدقاء كتير للقناة بيسألوا ازاى احدد سعر المنتج بتاعى؟
طبعا الاصدقاء دول عندهم حق يسألوا عن موضوع تحديد السعر ده
لان سعر منتجاتك من اهم العوامل اللى بتحدد مكسبك و اللى بناءا عليه قد ايه هتقدر تصرف على التسويق
و قد ايه ممكن شغلك يكبر، و الغلط فى تحديد السعر واحد من الاسباب الرئيسية ورا فشل تجارات كتيرة
ازاى تحدد اسعار منتجاتك للحصول على اكبر ربح ممكن؟
قبل كل حاجة لازم تتجنب:
التسعير العشوائى
بعض الناس لما تيجى تنزل منتج تخمن يا ترى الزبون ممكن يدفع كام و تحط السعر ده بطريقة عشوائية من غير سابق خبرة فى السوق او المنتج ,او معلومات دقيقة عن الزبون ممكن يدفع كام ,ومن غير تجربة او اختبار، و احيانا كتير بالطريقة دى بيفقدوا جزء كبير من الربح لان الزبون كان ممكن يدفع اكتر , او من ناحية تانية ممكن المنتج ما يتباعش لان السعر غالى بشكل غير منطقى
كمان من الطرق اللى مش مناسبة للمشاريع الصغير ة
سياسة الاختراق
بعض الشركات الكبرى بتتبع الاسلوب ده بتخفيض السعر للوصول لأكبر عدد من الزباين لان حصولهم على حصة كبيرة فى السوق بتخلى تكلفتهم تقل و كمان ممكن تقضى على المنافسين و السوق يفضى لهم
لكن بالنسبة للمشاريع الصغيرة و التجار الصغيرين الاسلوب ده مش هينفع و هيخسرك. ما تحاولش تنافس على اساس الارخص دايما ركز على القيمة . حصتك فى السوق مهمة لكن الاهم هو ربحك
تعالى بقى نشوف شوية خطوات لاختيار السعر ممكن تديك فرصة اكبر للمكسب
الخطوة الأولى: التكلفة بلس
بتحسب كل تكلفة المنتج من مواد خام لتصنيع لعمالة و نقل و دعاية الخ و تضيف ليها هامش الربح اللى عايزه يطلع لك سعر البيع .
دى اول خطوة منطقية لانها بتضمن لك ان السعر ده هيخليك تكسب
لكن
• مش بتحدد الى اى مدى انت ممكن تكسب و اذا كنت زى ما بيقولوا سايب فلوس كتير على الترابيزة
• الاكتفاء بالخطوة دى بيجبرك تركز على التكلفة بدل ما تركز على القيمة اللى ممكن تقدمها للعميل و طبعا الزبون مايعرفش تكلفتك ولا تفرق معاه هو يفرق معاه بس القيمة اللى هيحصل عليها من منتجك ,
• كمان الطريقة دى مش دقيقة لان التكلفة ممكن تقل مع زيادة الكمية و كمان ممكن تزيد لو اضطريت تشترى ماكينات جديدة او مقر اكبر يعنى التكلفة مش امر ثابت دايما
• الحل ان التكلفة تكون نقطة البداية بس و لكن بالتركيز على اضافة القيمة ممكن توصل لسعر اعلى بكتير من التكلفة الفعلية
الخطوة التانية: دراسة سعر المنافسين
معظم اصحاب الاعمال و التجار بيستخدموا الطريقة دى , ايه سعر المنافسين ؟ هنبيع زيهم . رغم انك ما تعرفش هم تكلفتهم ايه و امكانياتهم ازاى واللا هم كسبانين واللا خسرانين , ممكن تسالنى هو معقول حد يبيع بخسارة ؟ اه احيانا حد بيبيع بخسارة عشان يجر الزبون لمنتج تانى هيكسب فيه كويس فلو قلدته من غير مايكون عندك المنتج التانى اللى هتكسب فيه مش هتاخد غير الخسارة
طيب ازاى نستفيد من سعر السوق فى تحديد سعرنا
لو منتجك مماثل تماما للمنافسين هتضطر مع الاسف انك تنافس على اساس السعر يعنى يكون سعرك مماثل او اقل و هنا يكون تركيزك على تقليل التكلفة و زيادة إجمالي المبيعات كوسيلة لزيادة الربح
لكن الافضل طبعا إنك تضيف ميزة ترفع من قيمة منتجك و تديك فرصة ترفع سعرك عن السوق و بالتالى نسبة الربح
الخطوة التالتة: الزبون ممكن يدفع كام
السؤال ده مهم لان قرار الشراء من عدمه هو فى النهاية فى ايد الزبون
و لكن فيه طريقتين للاجابة على السؤال ده : واحدة غلط: ان البائع بيعمل بحث صغير و يسأل الناس ممكن تدفع كام فى المنتج ده و طبعا اللى اتسأل هيعمل ناصح شويتين و يقترح سعر اقل
دراسات كتيرة اثبتت ان فيه دايما فرق بين اللى الناس بيقولوا انهم هيعملوه و اللى بيعملوه فعلا ,غالبا الناس هتقول لك اللى انت عايز تسمعه او اللى فى مصلحتهم و نادرا ما يقولوا الحقيقة , مجرد طبيعة بشرية !
غير بقى ان لو سألت واحد مش زبون محتمل لمنتجك فاجابته لا يعتمد عليها يعنى لو هتاخد رأى واحدة ما عندهاش اطفال صغيرة فى سعر غذاء جاهز للاطفال هتديك سعر مختلف عن واحدة عندها اطفال و استعداد تعمل اى حاجة عشان توفر لهم غذا ء مفيد و سهل التحضير
الاجابة الصح لمعرفة الزبون ممكن يدفع كام انك تعرض المنتج بالسعر ده فعلا و تشوف كام واحد هيشتريه و تغير السعر بناءا على كده
فيه بقى طريقة متقدمة شوية
طريقة القشد
معلش اسمها بالانجليزى skimming يعنى كشط طبقة القشدة من على وش اللبن
بتحط سعر عالى يجذب كريمة السوق ,الناس اللى معاها تدفع بس بشرط ان ده يرتبط بقيمة معينة تخلى الزباين دول يحسوا انهم مميزين .تركيزك هنا بيكون على الحصول على ربح كبير جدا من كل وحدة بتبيعها و مش بتضطر تبيع عدد كبير , فيرارى و رولكس مش بيحاولوا يبيعوا لكل الناس لكن بمبيعا ت اقل ممكن يكسبوا اكتر من شركات كتير بتبيع عربيات و ساعات اكتر منهم و لكن بربح اقل فى الوحدة
فيه مرحلة تانية من القشد دى هى
القشد المتكرر
يعنى تنزل بسعر عالى و تبيع لكريمة السوق و بعدها لما معظم الطبقة الاولى تكون اشترت خلاص المبيعات تقل فتنزل بسعرك و تبيع للطبقة اللى بعدها و هكذا ,
و بعدين تنزل منتج مطور بسعر اعلى و تبيعه للطبقة الاولى و هلم جرا
ده بيحصل كتير فى سوق الاكترونيات و الموبايل
فى النهاية عايزك ما تنساش ان ازاى تحدد اسعارك هو واحد من اهم القرارات اللى لازم ياخد حقه فى التخطيط عشان يديك اكبر ربح ممكن
