كيف تسوق لنفسك عن طريق الانترنت

Facebooktwitterlinkedinmail

هل بتفكر فى العمل المستقل او انك تبقى  فرى لانسر كمصدر دخل اضافى او كوسيلة للتخلص من الوظيفة
ولكن متردد   لانك خايف ما تقدرش تجتذب العملاء  لتأمين كم كافى من الشغل يوفر لك مستوى معيشى جيد
فى حلقة النهاردة هاتكلم عن طرق تساعدك تسوق لنفسك وتجذب اليك الزباين عن طريق الانترنت من غير تكلفة أو بتكلفة قليلة

من الفروق الاساسية بين الفرى لانسرز الناجحين و الغير ناجحين بجانب طبعا المهارة فى مجالهم هو شهرتهم و انتشار اسمهم بين الزباين
وفى وجود الانترنت بامكانك تبنى الشهرة والسمعة دى ببلاش. بس طبعا فيه مقابل تانى هو المجهود و الوقت

و ده من خلال الوسائل دى

بورتفوليو قوى

من اول الحاجات اللى بيشوفها العميل هى البورتفوليو بتاعك و فكرة البورتفوليو  متعارف عليها فى مجال الجرافيك ديزاين فمعظم الديزاينرز لهم بورتفوليو على بيهانس و بعضهم عامل موقع لعرض شغله
و لهم حق لأن فى المجال ده البورتفوليو دليل قوى وواضح على مستوى شغل الديزاينر
و طبعا لو انت مصمم جرافيك سهل تعمل بورتفوليو لعرض  شغلك ده اذا ماكانش عندك بورتفوليو فعلا
طيب لو انت مش مصمم جرافيك هل فيه وسيلة لعمل بورتفوليو ؟ طبعا
لو انت كوبى رايتر أو كاتب ممكن تعرض عينات من كتاباتك
لو انت مترجم ممكن تعرض عينات ترجمتك
لو مهندس ديكور ممكن تعرض صور المشاريع اللى نفذتها
لو مدرس ممكن تعرض عينات من دروسك
حتى لو انت دكتور اسنان أو تغذية أو تجميل  البورتفوليو بتاعك هو صور قبل و بعد للنتايج الباهرة اللى عملتها لعملائك

ملحوظة ساعات العملاء بيرفضوا عرض شغلهم على الانترنت هنا ممكن تعرض عينات تجريبية خاصة بك و  مش بتاعة عملاء . الكلام ده طبعا لا ينطبق على الدكاترة


فكر ازاى ممكن تعرض نتيجة شغلك على الانترنت

اظهر خبرتك

لو ماتقدرش تعرض شغلك زى لو انت دكتور قلب أو محاسب تقدر تبين خبرتك و معرفتك بمجالك من خلال مدونة  او محاضرات على يوتيوب او بوستات فيسبوك تتكلم فيها عن المجال بتاعك و الجديد فيه و نصايحك للعملاء

شهادات العملاء

كتير من العملاء بيخاف من التعامل مع فريلانسرز بسبب انه اتعرض لموقف محرج من فريلانسر اختفى وسط مشروع وبطل يرد على التليفون
ازاى تطمن العملاء انك مش من دول ؟ بشهادات العملاء السابقين انشر هذه الشهادات بتاعة العملاء اللى اتبسطوا من التعامل معاك و قد ايه انت متمكن من مجالك و يعتمد عليك

شهادات او ترخيص او جوايز

لو حصلت على شهادات معتمدة او ترخيص او جايزة  اعرضها فى موقعك وعلى السوشيال ميديا

افتح قنوات التواصل مع العملاء

من اسباب النجاح انك تتواصل مع العملاء باستمرار عشان تقدر توصل لهم اللى انت عايزه وتفضل فى بالهم وقت مايحتاجوك و عشان لما يحبوا يوصلوا لك يقدروا
و النهارده ده اصبح اسهل من خلال الايميل و السوشيل ميديا

سهل عليهم الوصول ليك

بعض الناس بينسى المعلومة الاساسية دى ايميلك و تليفونك مهمين ولازم تخليهم فى مكان واضح فى موقعك او على صفحتك

اطلب اكشن

دايما اطلب من الزاير يبعت لك و يطلب الخدمة اللى عايزها بالتحديد و بوضوح او يسيب لك رقمه او ايميله عشان تكلمه

صورتك

كتير من  الناس بيخجل يحط صورته لكن الصورة ضروريه. الناس بتحب تحس انها عارفة الشخص اللى بتتعامل معاه كمان  الناس صعب تثق بحد مش شايفينه

لو عندك أفكار اضافية شاركنا بيهافى التعليقات

Facebooktwitterlinkedinmail

Similar Posts

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *