فيه سؤال اتكرر من اكتر من واحد من المتابعين بخصوص الخجل من البيع
فرانسين بتقول “مشكلتي مبعرفش أبيع و عندي خوف من المشتري و بستحي لما بعرض عليه منتجي”
فى الحلقة دى هنشوف ازاى نتخلص من الخجل و نزود الثقة فى نفسنا و احنا بنبيع
الحقيقة ان الحل للتخلص من الخجل من البيع انك ماتبيعيشى
ازاى الكلام ده؟
خلينى أسألك سؤال بسيط , بتفكرى فى ايه و انت رايحة تبيعى المنتج للزبونة
بتفكرى انك انت المستفيدة من البيع و بالتالى انت اللى محتاجة للزبونة مش كده
• عشان كده أول حاجة هتعمليها هى تغيير الفكرة دى
دايما تخيلى الزبونة دى صديقة محتاجة للمنتج بتاعك و انت جاية تقدمى لها خدمة , تفتكرى هتكونى خجلانة و انت بتقدمى خدمة لصديقة؟
• ثانيا لما تكونى عايزة تساعدى صديقة بتعملى ايه ؟ مش هتبدأى بالكلام عن نفسك و منتجك و انما هتتكلمى عنها , عن الزبونة , هتسأليها عن احتياجاتها , فرانسين بتبيع زيوت طبيعية فممكن تبدأ بسؤال الزباين عن استعمالهم للزيوت دى , امتى بيستعملوها , و لأى الاسباب , و ايه الانواع اللى بيستخدموها حاليا و ايه اللى بيعحبهم فيها و الاهم ايه اللى ناقصهم
• طيب بعد ما سألتى: اسمعى الاجابة كويس هو انت محتاجة أقول لك ده ؟ الحقيقة اه . ساعات من كتر ما بنكون متوترين و عايزين نحضر اجابتنا أو هنقول ايه تانى مش بنركز فى الاجابة اللى الزبون قالها
• بعد كده كل اللى انت محتاجاه انك تبينى للزبونة ازاى منتجك بيحقق لها اللى هى محتاجاه
انت بتشوفى هى محتاجه لايه و بتوريها ازاى ممكن تحصل عليه , مفيش اسهل من كده
• طيب لو الزبونة قالت مش عايزة أشترى, برضه اسأليها ليه . و ماتكتفيش بأول اجابة انما اسأليها ايه كمان , كلمة السر هى ايه كمان كرريها اكتر من مرة و غالبا هتلاقى ان السبب الحقيقى بييجى بعدين , يعنى ممكن فى الاول تقول لك مش محتاجة الزيت أو موجود عندى زيت أو سعره غالى , و لكن لما تسأليها ايه كمان ممكن تقول لك خايفة أجرب حاجة جديدة هنا هتوجهى كلامك لازاى تطمنيها و تثبتى لها فعالية و امان منتجك و ممكن تستشهدى بزباينك اللى جربوا
يبقى التخلص من الخجل فى 3 خطوات
1.اسألى و اسمعى
2.ليه و ايه تانى
3.اعرفى اللى الزبونة محتاجاه و قدميه ليها
بكده هتبيعى من غير ما تبيعى
