Share on facebook
Share on twitter
Share on linkedin
Share on email

كيف تقنع العميل بالشراء الآن وليس لاحقا

كم مرة مريت بالمواقف دى ؟

بعد ماتشرح للعميل كل حاجة عن منتجك او خدمتك يقول لك مش قادر اخد قرار الآن أو كلمنى بعد كام يوم أو انا هاتصل بيك تانى 

وكم مرة بصراحة رجع لك واشترى؟ 

لو انت شغال مبيعات بزنس لبزنس أو بتبيع خدمات أو منتجك غالى زى العقارات والسيارات والأجهزة الكهربية غالبا مريت بالتجربة دى أكتر من مرة

 

وأكيد انت عارف تأثير التسويف ده لانه أولا البيع المتأخر بيأثر على الكاش وانت محتاج الفلوس الآن مش لما العميل يفكر

وثانيا ممكن البيعة تضيع أصلا لأن العميل قابلته حاجة تانية اضطر يحط فلوسه فيها أو منافس ليك قدر يقنعه بالشراء على طول أو  بمرور شوية وقت بيبدأ يفكر ان الموضوع مش ضرورى طالما قدر يعيش من غير المنتج أو الخدمة

 

حل المشكلة دى انك تخلق إحساس بالاستعجال أو العجلة عند العميل وتخليه ياخد قرار الشراء بسرعة حبذا دلوقتى او على الأقل خلال أيام قليلة

ازاى تخلى العميل يقرر بسرعة؟

لازم منتجك أو خدمتك يكونوا جيدين

طبعا من البديهى ان لو المنتج مش جيد مافيش اى وسيلة من وسائل الاستعجال اللى هاقول لك عليها هتجيب نتيجة  

لازم تفهم العميل كويس

مرحلة الاستكشاف هي مرحلة تجميع المعلومات من العميل قبل ما تعرض عليه المنتج أو الخدمة أثناء المرحلة دى مهم جدا تفهم احتياجات ومشاكل العميل علشان تعرض عليه الحافز المناسب زى ما هنشوف بعد شوية

والفهم هييجى لما تتبع الطريقة الصحيحة بالاسئلة و الانصات الجيد أكتر من الكلام ومحاولة البيع طول الوقت

اسأل العميل ايه المشاكل اللى بتقابلك الآن ؟ ايه تأثيرها على البزنس؟ لو استمرت ممكن يحصل ايه؟

أو ايه الهدف اللى عايز توصل له ولما توصل هيكون ايه العائد على البزنس؟

بالطريقة دى هيحصل حاجتين مهمين جدا

أولا هتقدر  تفهم احتياجاته و أهدافه علشان تستخدم المعلومة دى وانت بتبين له  ازاى منتجك هيساعده يحقق الأهداف دى 

 وكمان تفهم مشاكله يعنى  الحاجات اللى مضايقاه في البزنس أو المخاوف اللى شايل همها

سواء كانت مشاكل في الإنتاجية أو العمليات أو الماليات  وبرضه هتستخدم المعلومات دى علشان توضح له ازاى الحل بتاعك هيساعده في علاج  مشكلته

ثانيا الأهم من كده انك مش هتحتاج لمجهود كبير علشان تحفزه للقرار لأنك بأسئلتك دى خليته هو يرسم صورة المشكلة ويعيشها وجبتها لبؤرة تركيزه دلوقت

وده هيساعدك تخلق  الإحساس بالعجلة ده في خطوة توضيح العواقب اللى هنيجى لها كمان شوية

استعين بالبيانات

مش بس هتستعين بالمعلومات الداخلية عن العميل والشركة انما كمان استعين بكل المعلومات الخارجية اللى ممكن تساعدك توضح للعميل ازاى التأخير بيؤذى البزنس بتاعه

يعنى لو بتبيع كاميرات المراقبة ابحث عن البيانات المتعلقة بالموضوع ده زى السرقات والجرايم في المنطقة أو البلد و استخدم المعلومة دى وانت بتقنع العميل

وضح له العواقب

هنا بقى هنبنى على خطوة الاستكشاف وعلى المعلومات اللى انت جمعتها من البحث والدراسة علشان نرسم للعميل صورة للعواقب اللى ممكن يتعرض لها لو اتأخر في القرار

ساعات بيكون العميل مش واخد باله من أبعاد مشكلته أو مش مقدر خطورتها

في الحالة دى لازم توضح له العواقب اللى ممكن تحصل لو ما استفادش بمنتجك أو خدمتك زى  المكسب اللى ممكن يفقده أو الإنتاجية اللى هتقل أو تعرضه للسرقة لو ماركبش كاميرات المراقبة دلوقتى       

استخدم حافز مؤقت

الرغبة في المكسب أو في الحصول على شيء مجانى محفزة لكل الناس

ممكن تعرض بونص أو حافز مؤقت زى التوصيل المجانى او الصيانة المجانية أو خصم  في حالة الشراء الآن أو خلال أسبوع مثلا

استخدم الندرة

نفسيا كل الحاجة ما زادت وانتشرت كل قيمتها ما قلت و كل ماقلت كل ما الرغبة فيها زادت حتى مجرد إشاعة ان حاجة معينة هتنقص بتخلى كل الناس تجرى تشتريها بكميات اكتر من حاجتها علشان تخزنها وكلنا شفنا الموقف ده في أيام الكورونا  لما الناس جريت تخزن الأكل

وتأثير الندرة مش بس في الاكل انما شركة ابل لعبت اللعبة دى اكتر من مرة وهى بتنزل موديلات جديدة من ايفون والناس كانت بتروح تبات قدام المحل قبل مايفتح علشان تلحق قبل ما الأجهزة تخلص

انت تقدر تستخدم العامل ده من خلال عرض كمية محدودة أو العرض حتى نفاد الكمية

الندرة دى مش بس في المنتجات كمان في الخدمات لما تقول انك كامل العدد أو محجوز طول الشهر الجاى ده بيزود اقبال العملاء على الحجز الآن

فترة محددة

الشق التانى من الندرة هو الندرة الزمنية يعنى العرض لمدة محددة يحفز العميل على اتخاذ القرار

قل ان العرض ده لمدة يومين فقط أو خلال الأسبوع ده أو يوم عيد الأم فقط الخ

لو تعرف الموعد الأقصى للعميل استخدمه يعنى اسأل العميل محتاج المنتج أو الخدمة متواجدين عنده بحد أقصى امتى يعنى لو عايز  السوفتوير من  أول الشهر لازم تمضى العقد دلوقت علشان يكون شغال عندك أول الشهر

مواقع التسويق الالكترونى زى امازون بتستخدم الأسلوب ده وبتحط تايمر جنب المنتج بيقول لو عايز المنتج يوم الخميس مثلا اطلب الأن واستفيد من الشحن السريع

حاجة تانية تقدر تعمل فيها الوقت المحدد تحديد فترة صلاحية للعرض يعنى في البزنس لبزنس كتير بتبعت عرض سعر للعميل لازم تضيف ان العرض ده سارى لمدة أسبوع او اتنين يعنى مش مفتوح ولازم العميل يفهم انه لو اتاخر عن الموعد ده انت مش هتقدر تضمن له السعر ده

تابع بسرعة

علشان تقصر الفترة خلى استجابتك ومتابعتك سريعة يعنى لو العميل قال لك كلمنى تانى كلمه تانى يوم مش بعد أسبوع

طبعا على حسب سعر المنتج لو منتج مش غالى والقرار مش محتاج تفكير كتير كلمه اسرع لكن لو منتج غالى ممكن تديه فرصة أطول للتفكير لكن برضه كل ما تابعت أسرع كل ما قللت من التسويف         

كلمة أخيرة لا تبالغ في استخدام أساليب الاستعجال زى الندرة والوقت المحدد علشان ماتفقدش تأثيرها     

للمزيد أكتب بريدك الالكترونى

سوف أرسل لك معلومات وفيديوهات تساعدك على النجاح فى البزنس 

المزيد من الحلقات

سبعة طرق للترويج لمشروعك بواسطة صفحة فيسبوك

تعرف انك ممكن تروج للبزنس بتاعك سواء كان اونلاين او اوفلاين من داخل صفحة الفيسبوك ومن غير ما تستخدم  Ads manager في بوست النهارده هاقول لك على 7 طرق تقدر تعمل بيها ترويج للبزنس مباشرة من داخل الصفحة وهاقول لك امتى تستخدم كل طريقة وفيهم طريقة ممكن تساعدك في حل مشكلة السعر انبوكس فيه طريقين

المزيد
احترف التسويق الالكترونى بالمحتوى

احترف التسويق الالكترونى بالمحتوى

في مقال النهارده هنعرف ايه هو المحتوى وايه أهميتة   وهنعرف ازاى المحتوى لازم يناسب العميل ويناسب المرحلة اللى العميل بيمر بيها ويساعد فى تحريك العميل من مرحلة للتانية في رحلته ايه المحتوى وايه أهميته   المحتوى مش بس المدونة أو البلوج ،المحتوى هو كل حاجة انت بتحطها على الانترنت سواء بلوج بوست أو سوشيال

المزيد

ابدأ رحلتك مع التسويق الالكترونى بفهم رحلة العميل

ينفع تقابل واحدة ما تعرفش عنها أي حاجة ولا هي تعرف عنك أي حاجة ومباشرة أو خبط لزق تطلب منها الجواز؟ غالبا لأ ولو انت عملت كده فهى غالبا هترفض ويمكن تشك في قواك العقلية ايه علاقة ده بالتسويق الالكترونى  وعنوان مقال النهارده  كمل  قراءة علشان تعرف واحد من المفاهيم المهمة جدا في التسويق الالكترونى

المزيد