ممكن أسألك سؤال مين الزبون بتاعك؟ طيب تعرف ايه عن الزبون بتاعك
ما تستغربش. رغم بساطة السؤال ده لكن ناس كتير مش بتعرف تجاوبه او بتجاوبه غلط وده ممكن يكلفهم كتير
في حلقة النهارده هتعرف طريقة تحدد بيها الزبون وترسم له صورة واضحة جدا هتغير الطريقة اللى بتسوق بيها
ممكن يكون عندك أعظم منتج في الدنيا لكن لو مش عارف من الزبون هتسوق له ازاى
ولو حاولت تبيع منتجك العظيم ده للشخص الخطأ عمرك ما هتقدر
علشان كده مهم جدا انك تفهم الزبون بتاعك وتكون له صورة واضحة
وفيه وسيلة او أداة ممكن تساعدك على فهم الزبون ورسم صورة دقيقة ليه
الوسيلة دى هي customer avatar او الصورة الرمزية للعميل
الصورةالرمزية او الافاتار بنرسمها من خلال معرفة معلومات معينة عن العميل وفيه template او قالب بسيط ممكن يساعدك ترتب افكارك وانت بترسم الصورة دى
سجل بريدك الالكترونى ونزل القالب
1-بياناتهم الديموجرافية
في المركز او السنتر من القالب هتسجل البيانات الديموجرافية للزبون ويمكن الجزء ده معروف من زمان في التسويق التقليدي بتقسيم السوق والاستهداف segmentation and targeting
لكن احنا هناخد الفكرة خطوة ابعد شوية وهنخليها مشوقة اكتر
هتخلق شخص وهمى او تخيلى يمكن تحس انه طلب غريب شوية لكن صدقنى هيساعدك تتخيل الزبون بشكل واضح جدا هتحس انه انسان حقيقى
اختار للزبون اسم حدد سنه نوعه جنسه الحالة الاجتماعية الأولاد عددهم واعمارهم مكان السكن الوظيفة مستوى الدخل التعليم
وحط صورة تمثل الزبون ده ممكن تنزل صورة من الانترنت
لما تقول الشخصية الرمزية او الافاتار رمزى صاحب شركة دعاية عمره 40 سنة متزوج وعنده طفلين عايش في القاهرة شركته متخصصة في الديجيتال ماركتنج هو صاحب الشركة والمدير التنفيذي دخله السنوي 600 الف خريج جامعة
تفتكر الصورة دى هتساعدك اكتر من جملة الزبون بتاعنا صاحب شركة دعاية
2-افهم أهدافهم وقيمهم
ايه الأهداف اللى زبونك عايز يوصل لها وانت تقدر من خلال منتجك أو الخدمة اللى بتقدمها تساعده يحققها
مثلا صاحب شركة دعاية ايه أهدافه
زيادة حجم البزنس تطوير قدرات فريق العمل
طيب الأهداف متفقين على أهميتها لكن ايه أهمية نقطة القيم
لأن ممكن تحقق نفس الهدف بطريقة تتماشى مع قيمك وممكن تحققه بطريقة تتنافى مع قيمك يعنى مثلا زيادة حجم البزنس هيكون من خلال التسويق للخدمات اللى بتقدمها واللا بشراء ذمة المسئول عن التسويق في بعض الشركات
بناءا عليه الأفاتار بتاعنا رمزى صاحب الشركة دى ملتزم باستخدام أساليب التسويق النضيفة والتطوير المهنى للموظفين وتقديم أعلى قيمة للعملاء
فهمك للحاجات دى هيساعدك وانت بتطور منتجاتك وكمان وانت بتحدد الرسالة الاعلانية اللى هتقولها في اعلاناتك
3-اعرف مصادر معلوماتهم
فهمك لمصادر معلومات الزبون هيساعدك تحدد تتواجد فين يعنى العميل بيقرا كتب ايه مجلات ايه بيتابع مواقع معينة مدونات بيروح مؤتمرات او معارض معينة بيتابع مين من الخبراء في مجاله كل ده هيساعدك تحدد تعلن فين وتتكلم ازاى معاهم بلغة يفهموها
4-مشاكلهم والتحديات اللى بتواجههم
ايه المشاكل اللى بتواجه الافاتار بتاعك في البزنس ايه الحاجات اللى بتخليه ماينامش من القلق
طبعا ركز على المشاكل اللى انت تقدر تساعدهم في حلها
ده هيساعدك في تطوير منتجات تحل المشاكل دى وكمان في صياغة الإعلانات بتاعتك ورسالتك الاعلانية بحيث تضغط على مواضع الألم دى
5-اعتراضاتهم على الشراء ودورهم في عملية الشراء
مفيش منتج كامل 100% كل منتج أو خدمة ممكن يكون فيهم نقص معين وده ممكن يكون سبب رفض الزبون يشترى منك افهم ايه المشكلة دى وسبب اعتراضه وشوف ازاى تقدر تحلها
السؤال التانى هل الشخص ده هو صاحب القرار في عملية الشراء
لو هو صاحب القرار هتتعامل معاه بأسلوب مختلف عن لو كان مش صاحب القرار
دى مكونات الtemplate
احب اضيف كام نقطة
أولا. كم افاتار ؟
أوقات كتيرة هتحتاج تعمل اكتر من افاتار يعنى ممكن المنتج او الخدمة اللى بتقدمها تكون مناسبة لاكتر من نوع من الزباين وكل واحد منهم محتاج رسالة مختلفة شوية مثلا لو بتقدم كورسات التسويق الالكترونى ممكن الافاتار يكون شركات التسويق الإلكتروني اللى عايزة تدرب الموظفين فيها وممكن يكون أصحاب الشركات الصغيرة اللى عايزة تدرب مسئول التسويق فيها وممكن يكون الفريلانسرز اللى عايزين يطوروا نفسهم ويسوقوا لنفسهم كمسوقين
ثانيا. الأفاتار أساس مهم لكل حاجة
الافاتار وفهمك الجيد لزبونك هيأثر مش بس في التسويق انما في كل حاجة في البزنس بتاعك
يعنى التسويق والتسويق الالكترونى بيشمل حاجات كتيرة زى المحتوى والايميل والاعلانات وصناعة المنتجات والسوشيال ميديا والcopywriting وغيره
كل حاجة من الحاجات دى لها علمها ومهاراتها الخاصة بيها اللى لازم تتقنها علشان تقدر تنجح فيها
لكن معرفة الزبون مهارة أساسية للنجاح في اى مجال من المجالات اللى قلتها
مثلا التسويق بالمحتوى الافاتار هتساعدك تحدد البوستات اللى تكتبها او الفيديوهات اللى تعملها
في الإعلانات المدفوعة معرفة الافاتار هتساعدك تحدد اعلانك ينزل فين ويقول ايه وتستهدف الaudience ازاى
تطوير المنتجات لو بدأته بمعرفة الافاتار هتقدر تعمل منتجات الزبون بتاعك عايزها
Copywriting لما تكتب وانت عارف الافاتار هتكتب إعلانات بتخاطب مشاكل ورغبات الزبون وتقدر تقنعه
الايميل معرفة الافاتار هتساعدك تكتب ايميلات تتفتح اكتر والزبون يتجاوب معاها اكتر
باختصار كل تفاعل مع الزبون هيتحسن لو عرفت الافاتار
كل ما كونت صورة أوضح للزبون كل ما قدرت تلاقى الزبون ده وتقدم له الرسالة اللى تحركه وتقنعه
أخيرا. ابدأ
أوقات بتكون عارف الافاتار بتاعك بوضوح واوقات ممكن تحتاج تعمل survey او تقعد مع الزباين وتتناقش وتفهمهم اكتر
لو دى الحالة ما تستناش لما تخلص كل الأبحاث والاستقصاءات ابدأ باللى تعرفه وبعدين حسن الصورة بالتدريج وانت شغال
حط افتراضات وخد نوت انك تراجع الافتراضات دى وتتاكد منها
ونزل الtemplate وابدأ فورا باللى تعرفه وكمل وانت شغال
