لهذا يفشل اعلانك على الفيس بوك

من الشكاوى الشائعة جدا “عملت اعلان فيسبوك وماجابش نتيجة او فيه تفاعل كبير على الإعلان لكن مافيش بيع”
“هي إعلانات فيسبوك مابقاش لها لازمة؟”
طبعا فيه اكتر من سبب للشكوى دى لكن واحد من الأسباب المهمة هو أول خطوة في الإعلان، اختيار هدف خاطئ للحملة الاعلانية
علشان كده في حلقة النهارده هاتكلم عن ازاى تختار الهدف الصح للحملة الاعلانية على الفيسبوك
وهاقول لك الأهداف الى ممكن تحتاجها معظم الوقت والأهداف اللى ممكن نعتبرها تضييع للفلوس

لما بتبدأ تعمل اعلان على الفيسبوك، فيسبوك بيطلب منك اختيار هدف للحملة الاعلانية وبيديك 11 اختيار مختلف
الهدف او objective اللى هتختاره بيكون له تأثير كبير جدا على الحملة الاعلانية يعنى الهدف ممكن يحدد اذا كانت الحملة هتنجح واللا هتفشل
وللأسف ناس كتير مش بتعرف الفرق بين الاختيارات دى او تستخدم مين امتى وده بيؤدى الى ان الاعلان مش بيحقق الللى انت عايزه

أنواع الأهداف

فيسبوك بيقسم الأهداف دى ل3 مجموعات على حسب مراحل رحلة العميل المجموعات دى هي
• Awareness المعرفة او الوعى
• Considerationالاعتبار
• conversion التحويل
والمنطق وراء التقسيمة دى ان
الزبون لازم في البداية يعرف المنتج
وبعدين يفكر او ي consider انه يديك بياناته ويتحول الى lead
أو يشترى ويبقى زبون
ثم في المرحلة التالتة بيديك بياناته فعلا ويتحول الى lead او بيشترى فعلا

فيسبوك عايز يساعدك

فيسبوك بيقول لك انا عايز أساعدك تحقق هدفك من الحملة الاعلانية ودى الأهداف اللى ممكن أساعدك تحققها اتفضل اختار الهدف المناسب ليك وانا هاساعدك تحققه

فيسبوك بيعرف كل حاجة

فيسبوك بيقدر يعمل ده لأنه بيعرف كم هائل من المعلومات عن كل مستخدم
بيقدر يعرف مين متعود يدوس على اللنكات اللى في الإعلان
ومين بيتفاعل مع البوست باللايك والكومنت والشير
ومين عنده استعداد يسجل بياناته ويملا القوالب forms اللى بتوديه ليها من خلال الاعلان
وطبعا بيعرف مين عنده استعداد او متعود يشترى من خلال الإعلانات
يعنى فيسبوك عارف مين بيضغط لنك في اعلان وبعدين يشترى ومين بيضغط اللنكات لكن مش بيشترى
فيسبوك بيستخدم المعلومات دى وهو بيوجه اعلانك لمستخدم معين يعنى وهو بيعمل استهداف او targeting للمستخدم
يعنى فيسبوك بيلتزم بتنفيذ الاتفاق اللى اتفق معاك عليه
فنظريا لو اخترت الهدف الصح هتحصل على النتيجة اللى انت عايزها

طيب ايه سبب الشكاوى المتكررة اللى قلتها في المقدمة

واحد من الأسباب المهمة انك بتختار هدف انت بتظن انه هيحقق لك اللى انت عايزه لكن في الحقيقة الهدف اللى اخترته مش بيحقق اللى انت عايزه، ازاى الكلام ده؟
اللى بيحصل انك بتختار هدف مش بيخدم هدفك النهائي من الإعلان

مثل

من أمثلة اختيار هدف خطأ لو عايز تخلى الناس تشترك في webinar او تسجل بياناتها علشان فريق المبيعات يتابع معاهم بالتليفون بعد كده زى لو انت شركة عقارات مثلا
في الحالات دى الهدف يبدو منطقى انك تبعت الناس دى الى landing page او form علشان يسجلوا بياناتهم او يشتركوا في ال webinar فناس كتير بتختار الهدف الزيارات traffic يعنى منطقى انك عايز تبعت زيارات او traffic للصفحة دى
ولما تختار ال traffic فيسبوك هينفذ لك اللى انت عايزه وهيبعت لك كل ال traffic اللى انت عايزه لكن لما هتيجى تراجع نتيجة الإعلان هتلاقى ماحدش بيسجل بياناته او بيشترى، الغلط فين ؟
الغلط في ان مش كل واحد بيدوس لنك بيسجل بياناته او بيشترى
فلما انت طلبت traffic انت طلبت ان الإعلان يروح للناس المتعودة تدوس الlinks لكن لم تشترط انهم يشتروا وفيسبوك نفذ لك اللى طلبته لكن ده ما كانش اللى انت عايزه فعلا ما كانش هدفك الحقيقى النهائي
هدفك الحقيقى والنهائى كان انك تبعت زوار عندهم استعداد يسجلوا بياناتهم او يشتروا
يعنى هدفك ما كانش traffic هدفك كان conversion

الهدف الأكثر شيوعا

لو فكرت شوية هتلاقى ان ال conversion هو الهدف اللى انت محتاج له معظم الوقت
لأن معظم الوقت احنا عايزين الاعلان يخلى الناس تبقى leads او تشترى يعنى تسجل بياناتها وتبقى leads او تطلع فلوسها وتشترى
الحقيقة ان فيسبوك كمان مشارك في الخلط او الخطأ اللى بيحصل في اختيار الأهداف
لأن ال conversion أصلا مش conversion واحد
يعنى التحول او conversion ممكن يعنى التحول الى lead زى تسجيل بياناتك للاشتراك في webinar او تسجيل البيانات لتنزيل ملف او مشاهدة فيديو وممكن تسجيل البيانات علشان فريق المبيعات يتصل بيهم وممكن ال conversion طبعا يعنى الشراء

امتى تستخدم الأهداف التانية

هل معنى كلامى ده ان الهدف الوحيد اللى هتحتاجه هو ال conversion ؟ لأ طبعا والا كان فيسبوك لغى بقية الأهداف
• مثلا هدف الزيارات traffic ممكن تستخدمه لو كل اللى انت عايزه انك تبعت زوار للموقع علشان يقروا المحتوى الموجود زى مقالة جديدة نزلتها من غير ما تطلب منهم يسجلوا او يعطوك بياناتهم
• كمان ممكن يكون هدفك الناس تشوف فيدو انت نزلته على صفحتك فتختار الهدف مشاهدات الفيديو
ملحوظة الهدف ده مش للنكات يوتيوب اللى انت مشيرها على فيسبوك

اهداف بتضيع فلوسك

• من الأهداف اللى مش هتحتاجها brand awareness ده معناه انك عايز ـتقيس مدى تعرف وتذكر الناس للبراند بتاعك وبيحتاج ميزانية كبيرة وغالبا البراندات الكبيرة هي اللى بتقدر تستفيد من النوع ده
• ال تفاعل engagement ده من أنواع الإعلانات اللى ناس كتير بتعملها لكن يمكن الهدف منه بيكون تجميلى اكتر منه بزنس يعنى بيدى شكل حلو للصفحة والبوستات ونوع من ال social proof او الدليل على ان الصفحة شغالة
مبدئيا لو نزلت محتوى حلو ومهم للمتابعين بتوعك هيتفاعلوا معاه خصوصا لو طلبت منهم حاجة وشجعتهم على التفاعل ده
وثانيا زى ما قلت مش كل اللى بيتفاعل بيشترى