نداء لأصحاب الأعمال الصغيرة، احذروا هذا الخطأ في التسويق

في البداية أحب أقول لك لو بتعمل الخطأ ده انت معذور لأن للأسف المعلومات والأمثلة المتداولة عن التسويق معظمها جاى من الشركات الكبيرة زى كوكاكولا ونايكى Nike

وكتب التسويق وكورسات ال MBA دايما بتستعين بأمثلة وcase studies  من الشركات الكبيرة

وكل فين وفين لما بينزل كتاب بيركز على تسويق المشروعات الصغيرة والمتوسطة

وبالتالي أصحاب الأعمال الصغيرة مش بيلاقوا قدامهم غير المعلومات دى وبتكون النتيجة انهم يضيعوا مجهودهم وفلوسهم على نوعية خطأ من الإعلانات اللى ما اتعملتش علشانهم أصلا

بعد المقدمة السريعة دى تعالى نشوف يعنى ايه تسويق براندنج ويعنى ايه تسويق مباشر ونعرف كمان ازاى ان التسويق المباشر هو التسويق اللى لازم يكون الجزء الأكبر من التسويق بتاعك

الهدف

تسويق البراندنج

• وأحيانا بيسموه تسويق الصورة image marketing هو التسويق اللى بيركز على تكوين صورة ذهنية وخلق شعور ايجابى تجاه الشركة أو المنتج أو الخدمة في ذهن المستهلك أو العميل لكن مش بيطلب منك بشكل مباشر انك تشترى المنتج
• من الصور الذهنية اللى تسويق البراندنج بيحاول يزرعها في ذهن العملاء الجودة، السلامة، الخدمة، القيمة، البرستيج، الحفاظ على البيئة يعنى لما بتسمع اسم الشركة أو المنتج على طول ييجى في بالك واحدة من الصفات دى
• تسويق البراندنج بيركز على المدى البعيد يعنى بيربى زباين للسنين الجاية مش للموسم ده
• وطبعا الصورة دى بتتبنى باستثمارات كبيرة ومستمرة على مدى سنين وعلى فكرة ممكن الصورة اللى اتبنت في سنين دى تتهد في فترة قصيرة جدا لو الشركة أخلت بوعودها للزباين يعنى كأن الشركة عمالة تبنى رصيد عند الزبون وبمجرد الخطأ الرصيد ده بيضيع

التسويق المباشر

• direct marketing  أو تسويق الاستجابة المباشرة direct response marketing هو نوع من التسويق زى اسمه ما بيقول  هدفه الحصول على نتيجة أو استجابة مباشرة من فئة محددة من المستهلكين. عمل بزنس فورى: جذب زباين جداد، عمل تدفقات نقدية أو زبادة إيرادات، التخلص من مخزون زيادة، زيادة رواد المحل أو الموقع
• بمعنى آخر التسويق المباشر مصمم بحيث يسهل ال call to action
• في التسويق المباشر كأنك بتخاطب واحد واحد من الزباين

أمثلة

• أمثلة تسويق البراندنج إعلانات التليفزيون المنتشرة لكوكاكولا وبيبسى و نايكى واعلان فودافون وشريهان في رمضان اللى فات
• بالنسبة للتسويق المباشر فيه
• إعلانات السوشيال ميديا فيسبوك انستجرام يوتيوب
• إعلانات البحث على جوجل
• البيع الشخصى
• التسويق بالبريد العادى والكتالوجات
• التليماركتنج telemarketing
• التسويق بالبريد الالكترونى أو الايميل
• Sms
• التليفزيون: التسوق عبر التليفزيون يعتبر من التسويق المباشر

التكلفة 

• تسويق البراندنج بيحاول يوصل للملايين وبالتالي تكلفته بتكون بالملايين وأحيانا بالمليارات
• لكن التسويق المباشر تكلفته أقل لأنك بتصرف على وصولك للزبون اللى انت عايزه يشترى بس
• يعنى تقدر تجيب نتيجة بميزانية أقل بكتير من البراندنج

السرعة

• تسويق البراندنج بطىء ونتيجته على المدى البعيد زى ما قلنا مسوق البراند بيبنى للسنين والأجيال القادمة لكن التسويق المباشر نتيجته سريعة وفورية ممكن في خلال ساعات أو أيام

الاستهداف

• في تسويق البراندنج الاستهداف بيكون على مدى أوسع
• لكن في التسويق المباشر الاستهداف بيكون أدق يعنى بتستهدف زبون محدد
• التقسيم ده ممكن يكون على أساس السن او النوع او المنطقة الجغرافية التعليم الدخل وممكن يكون على أساس علاقة الزبون بالمنتج او العوامل النفسية

عرض offer

• التسويق المباشر فيه عرض محدد بعكس الغير مباشر والعرض ده متفصل على الشريحة اللى انت اخترتها
• العرض على فكرة مش مجرد المنتج العرض بيشمل كل اللى بتقدمه للزبون من ضمان وخصومات

Call to action

• التسويق  المباشر دايما فيه call to action  اشترى المنتج زور الموقع زور المحل اتصل الان

المقياس

• في تسويق البراند تقدر تقيس بعض الحاجات بس مش بدقة قوى زى تعرف الزبون على المنتج احساسه وانطباعه الذهنى ناحية الشركة أو المنتج لكن مش بتقدر تربط الحاجات دى بشكل مباشر بالبيع أو الربح وعادة المقاييس دى بتاخد وقت طويل
• في التسويق المباشر تقدر تقيس نتيجة مجهودك بمقاييس محددة يعنى تقدر تعرف بالظبط الأعلان اللى عملته كام واحد شافه كام واحد اتجاوب معاه كام واحد اشترى بسببه وفيه لستة طويلة من الاختصارات بتقيس كل ما يتعلق بالتسويق المباشر زى زى CTR , LTV, CPL cost per lead وعادة بتكون الاستجابة سريعة يعنى المقاييس دى بتتغير بسرعة

الوسائط

• تسويق البراندنج بيعتمد بشكل كبير على التليفزيون والراديو واللوحات الاعلانية billboards والمجلات والجرايد وبيستعين بالمشاهير
• وطبعا الشائع ان الوسيط المستخدم في التسويق المباشر حاليا هو الانترنت ووسائل الديجيتال ماركتنج
• لكن أحب اضيف ان مش الوسيط أو نوع الميديا هو اللى بيحدد دى للتسويق المباشر واللا لتسويق البراندنج انما الطريقة اللى بتستخدم بيها الوسيط ده، يعنى ممكن تستخدم التليفزيون أو الراديو أو الجرايد للتسويق المباشر زى ما هنشوف في الأمثلة بعد شوية

النصيحة

انت كصاحب بزنس صغير لازم تركز على التسويق المباشر وتبعد عن تسويق البراندنج

لأن ده اللى يجيب لك افضل عائد على تكلفتك ونتيجته سريعة ويمكنك قياسها بدقة

لكن أحب أضيف ان ده مش معناه ان البراندنج مالوش أي مكان في خطتك

يعنى التصميم واللوجو والألوان والسلوجان والمحتوى اللى بتحطه اونلاين وحتى تغليف المنتج كلها عناصر في البراندنج بتاعك لهم دورهم

لكن اللى أقصده انك مش محتاج تعمل حملات إعلانية مخصوصة للحاجات دى