هكذا يتغلب محلك الصغيرعلى كارفور

علشان تنافس الكيانات الكبيرة زى الهايبرماركت او السلاسل المشهورة  ويبقى عندك فرصة للانتصار عليها ما تحاولش تلعب في ملعبها او تستخدم استراتيجيتها

استخدم استراتيجية هم ما يقدروش ينافسوك فيها

جايز تكون مستغرب انى باطلب منك تفكر بشكل استراتيجى أو بتقول في نفسك  انا صاحب محل أو سوبرماركت ايه علاقتى بالاستراتيجية؟ الكلام ده بتاع كارفور والناس الكبيرة دى

اسمح لى اصلح لك مفهوم بسيط، الاستراتيجية مش حاجة معقدة او محصورة على الشركات الكبيرة

ممكن أي حد يحط استراتيجية لنفسه

يعنى لو انت عايز تخس شوية وقررت انك تتمرن لمدة ساعة  3 مرات في الأسبوع وتقلل السعرات اللى بتاكلها كل يوم بمعدل  500  سعر فدى تعتبر استراتيجية لتحقيق الهدف بتاعك

طب هي الكيانات دى استراتيجيتها ايه وأنت ممكن استراتيجيتك تكون ايه؟

الهيبرماركتس والسلاسل دى بيعتمدوا على التنوع الكبير وتغطية معظم طلبات الزباين، وبالتالي همه one stop shop

وكمان  بيعتمدوا على العروض والتخفيضات المستمرة أو اليومية

لكن انت كمحل أو سوبرماركت مش هتقدر تنافس في الحاجات دى

طيب انت تعمل ايه ؟

ايه الميزة التنافسية اللى تقدر تقدمها واللى تخلى الزبون يتخلى عن مزايا كارفور دى ويشترى منك

الحقيقة فيه أكتر من ميزة تقدر تميز نفسك بيهم وتساعدك تحافظ على الزباين بتوعك

وممكن ألخص الاستراتيجية ورا المزايا دى  في انك ماتحاولش تغلبهم في ملعبهم

 يعنى هم نقطة قوتهم التنوع الكبير والخصومات وانت مش هتقدر تغلبهم في دول

لكن تقدر تغلبهم في المعاملة كانسان لانسان والتخصص والاستجابة السريعة والخدمة الممتازة

وهاقول لك شوية طرق تقدر تطبق بيها الكلام ده  

1-المعاملة كانسان لانسان

الهايبر مش هيقدر ينافسك في الجزء ده لأن في الهايبر مفروض الزبون يخدم نفسه ومش متوقع من الكاشير يعرف عنك أي حاجة

لكن انت تقدر تميز نفسك بالمعاملة يعنى تعامل الزبون كصديق شخصى من خلال أسلوب ترحيبك بيه معرفة اسمه واسم أولاده عيد ميلاد الأولاد تقديم حاجات بسيطة زى قطعة حلوى أو كوب شاى

تعرف الحاجات اللى بيطلبها دايما

لازم الزبون يحس ان كل اللى في المحل بيحاولوا يساعدوه سواء البياعين او غيرهم

أحب أضيف ملحوظة، علشان تحقق ده لازم الموظف بتاعك سواء البياع او الكاشير  يكون مبسوط ومستقر يعنى مش كل يوم يروح واحد وييجى التانى

2-سرعة الاستجابة

من مزاياك كمحل او سوبر ماركت صغير سرعة الاستجابة يعنى الزبون لو ما لقاش اللى عايزه تقدر تقول له بكره هيكون موجود. هو ما يقدرش يعمل ده في الهايبر

3-الراحة والسهولة

• انت عندك ميزة انك اقرب واريح للزبون
• وتقدر تزود الميزة دى من خلال معرفتك الشخصية بالزباين وتوفير احتياجاتهم اللى ممكن ما يلاقوهاش بسهولة في الهايبر
• حتى في ترتيب المنتجات في المحل ممكن تسهل على الزبون الوصول للاصناف الشائعة ودى برضه ميزة مقارنة بالهايبر اللى ممكن الزبون يدور بالساعات على ما يلاقى الحاجة اللى عايزها
• كمان ممكن توفر خدمة الدليفرى

4-التخصص

حيث انك ما تقدرش تنافس في التنوع وعدد الأصناف اللى الهايبر بيبيعها تقدر تعمل العكس انك تتخصص في نوعية معينة من المنتجات لكن مع عرض تنوع كبير داخل النوعية دى يعنى مدى المنتجات أضيق لكن أعمق

5-التميز

ممكن تضيف حاجة مختلفة او مميزة في المكان الناس تعرفك بيها

• تغليف الهدايا
• التوصيل
• ساعات العمل
• سياسة التبديل والارجاع

6-الصورة الذهنية

كل محل له صورة ذهنية في دماغ الزبون

لازم يكون لك دور  ايجابى في رسم الصورة دى ماتسيبهاش للظروف

الصورة دى بترسمها من خلال كل الجوانب المادية والمعنوية اللى بتقدمها للزبون

يعنى ممكن تكون صورة المحل انه:

اكتر محل متعاون friendly Helpful

• التسوق فيه ممتع
• Chic
• خدمته سريعة

7-المزيج المناسب

مزيج المنتجات من العوامل الأساسية اللى بتحدد اختيارنا للمحل

فالمزيج المناسب من المنتجات ممكن يميزك، وبتركيزك على توفير المزيج المطلوب في منطقتك بتدى نفسك ميزة تنافسية

 الجميل هنا ان احتياجات كل شخص محدودة الى حد كبير يعنى انت مش محتاج لآلاف المنتجات اللى في الهايبر

وده لا يتعارض مع انك كمان ممكن تكون متميز في نوعية معينة من المنتجات يعنى كلنا عارفين ان لما تحتاج للصنف الفلانى هتلاقيه في المحل الفلانى 

8-الدعاية والتسويق 

كتير من أصحاب المحلات مش بيفكروا في التسويق لمحلاتهم يعنى بيقولوا الناس عارفة المحل او بيعتمدوا على WOM

يعنى السمعة الطيبة هتجيب الزباين

لكن ده مش كفاية الدعاية ممكن تضاعف مبيعاتك وتسرع انتشارك وحركة البزنس

ومش شرط ان الدعاية دى تكون حاجة مكلفة يعنى شوية مطبوعات او منشورات او كروت

صفحة فيسبوك او انستجرام واتساب بزنس

هنا تانى انت عندك ميزة لأنك تقدر تتواصل مع زباينك بشكل شخصى بعكس الهايبر

9-الأسعار

يمكن مش هتقدر تنافس في الأسعار زى الهايبرماركت لكن ممكن تستعين بالأسعار بشكل  تكتيكى

• يعنى ممكن يكون عندك loss leaders منتجات مكسبك فيها قليل لكن بتجيب لك زبون وبيشترى حاجات تانية
• منتجات مكسبك فيها عالى
• عروض مؤقتة لجذب الزباين

لكن تجنب انك تلعب على السعر الأرخص طول الوقت

لو طبقت الحاجات دى هتقدر تحتفظ بمجموعة من الزباين المخلصة لك والراضية عن محلك لانك ممكن تعتمد على عدد محدد من الزباين اللى في المنطقة الجغرافية بتاعتك وتجيب كل بدجتك منهم

ومش هتخاف من تهديد وحوش الهايبرماركت بعد كده