هل يمكن التسويق للأطفال قبل ولادتهم؟

Facebooktwitterlinkedinmail

تعرف ان فيه شركات بتحاول تتحكم فى أذواق أولادك و تحاول تبيع لهم منتجاتها و هم فى بطن امهم؟
العلماء من زمان عارفين ان الجنين بيسمع كلام امه , و المزيكا اللى بتسمعها
لكن الجديد بقا انهم اكتشفوا ان الجنين كمان بيتأثر بالمزيكا دى يعنى لو مزيكا هادية الواد يهدا و لو مزيكا مهرجانات الواد يركبه عفريت
و المفاجأة ان التأثير ده بيستمر حتى بعد ولادته لدرجة انه ممكن يأثر على ذوقه و اختياراته لما يكبر . يعنى لو المدام بتسمع عمرو دياب طول الحمل , البيبى هيطلع بيحب عمر دياب اكتر من غيره

طب و ايه المشكلة؟ ما تسيب العيال تتبسط
ما تستعجلش اوى كده
انت عارف ان اعلانات كتير بتستخدم مقاطع من اغانى او موسيقى الاغانى فى اعلاناتها , بتوع الاعلانات بيسموها جنجلز

يعنى ابن حضرتك لما يسمع موسيقى الاعلان اللى كان بيسمعها و هو فى بطن المدام هيتاثر بيها
لسه مش مصدق ؟ طب خد عندك
من كام سنة كدة شركة اسيوية فكرت انه حيث ان الحوامل بيقضوا وقت طويل فى التسوق انها تستغل الفرصة دى وتاثر عليهم من غير ما ياخدوا بالهم
ابتدت تشغل مزيكا هادية و مريحة للاعصاب و ترش بودره جونسون فى اماكن الملابس و عطر الكريز فى اماكن الاكل

التجربة نجحت مع الامهات لكن المفاجأة ان الامهات دى بعد سنة من التجربة ابتدت تبعت رسايل للشركة بتقول ملحوظة غريبة . الاولاد اللى عمرهم دلوقتى سنة  اول ما يدخلوا المول بيهدوا حتى لو كانوا قبلها بيعيطوا و متعصبين . و الاهم ان التاثير ده بيحصل فى المول ده بالذات مش فى اى مول
ادارة المول قعدت تحلل و تدرس و استنتجت ان الاولاد دول اللى اتعرضوا للمزيكا و الروايح و هم فى بطن امهاتهم استمر التاثير معاهم بعد ولادتهم بسنة
و استنتجوا ان ممكن ناثر على تصرفات الاجيال بالطريقة دى
اضرب لك مثل تانى شركة حلويات  فلبينية  اسمها كوبيكو بتعمل بونبونى بالقهوة يمكن تكون جربته
ابتدت توزع عينات البونبونى فى عيادات دكاترةالنسا و الاطفال  عشان يدوها للامهات الحوامل . ليه لان كوبيكوا كانت بتجهز  لتسويق قهوة كوبيكو واللى بالصدفة المقصودة كانت بنفس طعم البونبونى
و زى ما توقعت القهوة نجحت بين الامهات لكن الغريب انها نجحت جدا بين الاطفال اللى كانوا فى بطن امهاتهم وقت توزيع البونبونى


خلاصة الكلام ان تاثير التسويق ممكن يبدا بدرى اوى
وده بيدى معنى تانى خالص لتعبير بيربى زبون

Facebooktwitterlinkedinmail

Similar Posts

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *